प्रथम भित्रिकोट प्यूठान महोत्सवमा रेन्बो ट्राउट माछा बिक्रीका लागि राखिएको छ । २० डिग्री सेल्सियसभन्दा कम तापक्रममा मात्र हुने उक्त माछा स्वास्थ्यका लागि निकै राम्रो मानिन्छ । नौबहिनी गाउँपालिका वडा नं. १ स्याउलिवाङमा पालिएको उक्त माछा बिक्रीका लागि आयोजकले निःशुल्क स्टल उपलब्ध गराएको छ ।

स्याउलिवाङका शिव घर्तीले ३० लाख लागतमा कोठिभिर फिस फर्म सञ्चालन गरेका छन् । ‘महोत्सवमा व्यापार र प्रचारका लागि स्टल राखेका छौँ।’ घर्तीले भने– ‘मूल्य महँगो भए पनि स्वास्थ्यका लागि लाभदायी छ ।’ महोत्सव स्थलमा प्रतिप्लेट ४ सय रुपैयाँ र प्रतिकिलो १६ सय रुपैयाँका दरले बिक्री भइरहेको बताए । नेपालमा उत्पादन हुने सबैभन्दा राम्रो जातको माछा रेन्बो ट्राउट सुत्केरी महिला, मुटुरोगिका लागि उपयुक्त हुने चिकित्सकहरू बताउँछन् ।

जिल्लाका २ ठाउँमा यो जातको माछा पालन गरिएको छ । गौमुखी गाउँपालिका वडा नं. १ अर्खाको कुशलसिँह थापा मगरले पनि ट्राउट माछा पालन गरेका छन् । चिसो तापक्रममा मात्र हुने यो प्रजातिको माछा महोत्सवमा पहिलो पटक ल्याइएको हो ।