स्वर्गद्वारी नगरपालिकाले ५० वर्षभन्दा माथिको उमेरका नागरिकका लागि आँखा जाँच शिविर सञ्चालन गरेको छ । आँखाको अपरेसन गर्नुपर्ने नागरिकको पहिचानका लागि नगरपालिकाका ६ स्थानमा आँखा जाँच शिविर सञ्चालन गरिएको नगरपालिकाका प्रमुख प्रशासकीय अधिकृत विमल रिजालले बताए ।

बिहीबार नगरपालिकाको वडा नं. १ स्थित कोचिवाङमा शिविर सम्पन्न भएको छ । ७७ जनाको जाँच गरिएकोमा १४ जनाको अपरेसन गर्नुपर्ने देखिएको नगरपालिकाका प्रवक्ता सुरज सङ्गम सुनारले बताए ।

स्वर्गद्वारी नगरपालिकाले तिलगंगा सर्जिकल आँखा केन्द्र राप्ति दाङको प्राविधिक सहयोगमा शिविर सञ्चालन गरेको हो । शुक्रबार वडा नं. २ खाल, शनिवार वडा नं. ५ सारी, आइतबार वडा नं. ९ गोठिवाङ, सोमबार वडा नं. ६ बेलवास र मङ्गलवार वडा नं. ४ भिंग्रीमा स्कृनिङ शिविरको आयोजना गरिएको प्रमुख प्रशासकीय अधिकृत रिजालले बताए । उनका अनुसार स्थानीय स्तरमा हुने स्कृनिङ, अपरेसन गर्नुपर्ने बिरामीका लागि तिलगंगा सर्किजल आँखा केन्द्र राप्ति दाङ पुग्न यातायात र अपरेसनका लागि लाग्ने सबै खर्च गाउँपालिकाले ब्यहोर्ने छ ।