चुरोटको तलतल लाग्दा

सुटुक्क चर्पीमा छिर्छु,

नशामा झुम्न मन लागे

लुसुक्क भट्टीमा पुग्छु,

अर्को दिन चोक, चोकमा पुगेर,

अर्ति उपदेश दिन्छु….

धुमपान नगर, स्वास्थ्यको लागि हानिकारक छ ।

मद्यपान नगर स्वास्थ्यको लागि हानिकारक छ।।

कहिले काँही

झनक्क रिस उठ्छ,

आवेगमा मन थाम्नै सक्दिनँ,

घरकीका टाउकोका रौँ गन्छु

मुखमा आएजति भन्छु,

आमालाई त म गन्दै गन्दिनँ

छिमेकी दिदीबहिनी हुन् भन्दिनँ,

अर्को दिन चोकमा पुग्छु

अनि पुरानै उपदेश छाट्छु…

महिला हिंसा नगर, परिवारका लागि हानिकारक छ

महिला हिंसा नगर, समाजका लागि हानिकारक छ

***

चिने जत्तिसँग सापटी माग्छु

सके तिर्छु नसके लुकेर हिँड्छु,

आज नगद भोलि उधारो देख्दा देख्दै पनि

उधारो पाइन्न भन्ने जान्दा जान्दै पनि

उधारो लिन्छु र चोकमा पुग्छु

अनि सगर्व उपदेश दिन्छु…

पैसाको कारोबार साथीभाइमा हानिकारक छ ।

उधारो कारोबार साथी भाइमा हानिकारक छ ।।