प्यूठान नगरपालिका–४,स्थित थापा डाँडा–कार्की डाँडा क्षेत्रमा खानेपानी चरम अभाव भएको छ । थापा डाँडा–कार्की डाँडा लिफ्ट खानेपानी योजनाको ट्रान्सफर्मर बिग्रेका कारण खानेपानीको अभाव भएको हो ।

दुई वर्ष पहिले प्रदेश समपूरक योजना अन्तर्गत प्यूठान नगरपालिका मार्फत निर्माण गरिएको योजनाको ट्रान्सफर्मर एक साता अघि बिग्रेको स्थानीय बताउँछन् । यस क्षेत्रका १ सय ७० उपभोक्ताले पानीको समस्या भोग्न परेको प्यूठान नगरपालिका ४ का वडाध्यक्ष रेशम कार्कीले बताए ।  ट्रान्सफर्मर  मर्मत गर्न नगरपालिकामा पहल गरिरहेको कार्कीले बताए । वडाध्यक्ष मार्फत नगरप्रमुखसँग गुनासो गरेको एक साता हुँदासम्म सुनुवाइ नभएको उपभोक्ता समिति अध्यक्ष खड्कबहादुर भण्डारीले  बताए ।

प्यूठान नगरपालिकाको प्रमुख प्रशासकीय भवन नजिकैबाट लिफ्ट गरेर योजना निर्माण गरिएको छ । योजनामा पानी नियमित नहुँदा  थापा डाँडा, कार्की डाँडा र भेदाखर्कका स्थानीय खानेपानीको चरम अभाव झेल्न बाध्य छन्  ।