आइतबार प्युठानमा करदाता शिक्षा तथा अन्तरक्रिया कार्यक्रम सम्पन्न भएको छ। प्युठान उद्योग बाणिज्य संघ र आन्तरिक राजस्व कार्यालय तुलसीपुर दाङ्गको संयुक्त आयोजना र प्युठान नगरपालिकाको आर्थिक सहयोगमा प्युठानका व्यापार व्यावसायीहरुलाइ कर शिक्षा कार्यक्रममा पेसा व्यवसाय दर्ता कर प्रणालीका बारेमा जानकारी दिइएको थियो।

प्युठान उद्योग बाणिज्य संघका अध्यक्ष केदारमान कक्षपतिको अध्यक्षतामा भएको करदाता शिक्षा कार्यक्रममा प्युठान नगरपालिकाकि उप प्रमुख शान्ता आचार्य प्रमुख अतिथि, आन्तरिक राजस्व कार्यालय तुलसीपुर दाङ्गका प्रमुख कर अधिकृत गोपीकृष्ण कोइराला र सोही कार्यालयका कर तथा सूचना अधिकृत नारायण रिजाल विशेष अतिथि रहनुभएको थियो।

करजन्य विषय वस्तुमा धेरै व्यावसायीहरु अनभिज्ञ रहेकोले व्यावसाय चुस्त रहन नसक्ने र व्यावसाय गर्दा सरकारलाई तोकिए बमोजिमको कर तथा राजस्व बुझाउनु पर्ने व्यावसायीहरुको कर्तव्य भएकोमा उप प्रमुख शान्ता आचार्यले जोड दिनुभयो ।

आन्तरिक राजस्व कार्यालय तुलसीपुर दाङ्गका प्रमुख कर अधिकृत गोपि कोइरालाले आ-आफ्नो व्यावसायको कर अधिकृत आफै रहेको र जानकारी नभएको खण्डमा सिधा कार्यलय मै सम्पर्क गर्ने र बिचौलिया (दलाल) बाट टाढा रहन पनि सुझाव दिनुभयो ।

व्यवसाय नभए कर पनि नहुने तर आफुले गरेको कारोबारको सम्पुर्ण हिसाबकिताब राख्नु पर्ने, हिसाबमा पारदर्शिता हुनुपर्ने, वर्षौ देखि व्यापार गर्दै आएको तर कर नतिरेकाहरुको लागि तीन वर्षकोभित्रको कर बुझाउँदा अरु बाकी वर्षको कर मिनाहा हुने समेत कर अधिकृत नारायण रिजालले बताउनुभयो । विशेष छुट यहि फाल्गुन मसान्तसम्म मात्र रहेको पनि उहाँले जानकारी गराउनु भयो।

उक्त कार्यक्रममा उ.बा. संघका अध्यक्ष, पदाधिकारी, संघका कार्य समिती सदस्य, पत्रकार लगायत व्यावसायीहरुको सहभागी रहेको थियो।