जिल्लाको नौबहिनी र ऐरावती गाउँपालिका अन्तर्गतका विद्यालयहरु सञ्चालमा आएका छन् । कोरोना भाइरस कोभिडका कारण विद्यालय बन्द हुँदा विद्यार्थीको पठनपाठनमा असर परेको भन्दै अभिभाबकले विद्यालय खुलाउन अनुरोध गर्दै आएका थिए । नौबहिनी गाउँपालिका अन्तर्गतका विद्यालयहरु सोमबारदेखि सञ्चालमा आएको गाउँपालिकाले जनाएको छ ।

भाद्र २ गते बसेको प्रअहरुको बैठकले विद्यालय सञ्चालन गर्न गाउँशिक्षा समितिलाई अनुरोध गरेको थियो । शिक्षा समितिले निर्णय गरेर सोमवारदेखि विद्यालय सञ्चालनमा ल्याएको नौबहिनी गाउँपालिकाका निमित्त प्रमुख प्रशासकीय अधिकृत अरबिन्द्र बर्माले जानकारी दिए ।
बैकल्पीक विधि अन्तर्गत पठन/पाठन सुचारु गरेको नौबहिनीका शिक्षा शाखा प्रमुख डिल्ली आचार्यले बताए ।

दाङवाङ मा.वि. ऐेरावती १ अमिलि प्यूठानमा अध्यनरत विद्यार्थी

आचार्यका अनुसार कतिपय विद्यालयले आलो/पालो कक्षा सञ्चालन गरेका छन् । कुनैले अनलाइन जुम मार्फत कक्षा चलाएका छन् । यहाँ २९ वटा विद्यालय मध्ये २ वटा संस्थागत विद्यालय छन् । नौबहिनीमा १० हजार ६ सय ३६ जना विद्यार्थी रहेको गाउँपालिकाले जनाएको छ ।
यस्तै ऐरावती गाउँपालिका अन्तर्गतका विद्यालयहरु पनि सञ्चानमा छन् । यहाँ पनि प्रधानाध्यापकहरुले विद्यालय सञ्चालन गर्न अगुवाइ गरेका छन् ।

विद्यालय व्यबस्थापन समितिको निर्णय अनुसार विद्यालयहरु सञ्चालन गर्न लगाइएको ऐरावतीका शिक्षा शाखा प्रमुख यमप्रसाद पाण्डेले बताए । कुन विधि मार्फत कक्षा सञ्चालन गर्ने भन्ने कुरा विद्यालय व्यबस्थापन समितिलाई जिम्मा दिएको पाण्डेले बताए । उनले विद्यालय सञ्चालन गर्दा हालसम्म कोभिडको कारण कुनै समस्या देखा नपरेको जानकारी दिए । ऐरावतीमा श्रावण तेस्रो सातादेखि विद्यालय सञ्चालमा आएको छ । ऐरावतीका ४१ सामुदायिक ४ वटा सस्थागत विद्यालयमा ६ हजार २ सय ७५ जना विद्यार्थी छन् ।