महालेखा परीक्षणको कार्यालयले आव २०७६/०७७ को लेखा परीक्षण प्रतिवेदन सार्वजनिक गरेको छ । भाद्र ४ गते सार्वजनिक गरेको प्रतिवेदन अनुसार प्यूठानका ९ वटा स्थानीय तहमध्ये झिमरुक गाउँपालिकाको सबैभन्दा कम बेरुजु देखिएको छ भने सबैभन्दा धेरै सरुमारानी गाउँपालिकाको छ ।

झिमरुकले यो आर्थिक वर्षमा विनियोजन गरेको कुल ५ करोड १३ लाख ६ हजार रुपैयाँ मध्ये १३ लाख १० हजार रुपैया बराबरको वेरुजु देखिएको छ । यो ०.५ प्रतिशत हो । जिल्लाका अन्य स्थानीय तहहरुमा सरुमारानीको ५.६, नौबहिनीको ५.४२, मल्लरानीको २.७४, ऐरावतीको २.३, माण्डवीको १.६६ र  गौमुखी गाउँपालिकाको ०.५० प्रतिशत वेरुजु आएको छ ।

यस्तै प्यूठान नगरपालिका १.२३ प्रतिशत बेरुजु देखिएको छ । स्वर्गद्वारी नगरपालिकाको भने कोभिड महामारीका कारण लेखा परीक्षण हुन सकेको छैन् । महालेखा परीक्षणको कार्यालयले देशभरका  ६ सय ९९ स्थानीय तहको ८ खर्व १५ अर्व ९९ करोड बराबरको लेखा परीक्षण प्रतिबेदन सार्वजनिक गरेको हो । प्रतिवेदनमा ४० अर्व ८३ करोडको वेरुजु  देखाएको छ । यो कुल लेखा परीक्षण अंकको ५ प्रतिशत हो ।