प्यूठानको गौंमुखी गाउँपालिका ५ खुङमा अरिङगालले टोकेर एक जनाको मृत्यु भएको छ । पाँच जना घाइते भएका छन् । गएराती करिब ११ बजे उतीसको रुखमा रहेको अरिङगालको गोलो पोल्नेक्रममा गांैमुखी ५ सुन्दरमेलाका ३५ वर्षीय   कृष्णबहादुर थापाकाे मृत्यु भएको जिल्ला प्रहरी कार्यालय प्यूठानका प्रमुख डिएसपी सुवास खड्काले जानकारी दिए । अरिङगाले टोकेर थापा रुखबाट लडेका थिए । थापाको उपचारकोक्रममा जिल्ला अस्पताल बिजुवारमा मृत्यु भएको हो ।
घाइते सर्वोजित थापा, खगेश्वर गिरी, राम गिरी, पदम गिरी र दिपक गिरीको जिल्ला अस्पताल बिजुवारमा उपचार भैरहेको छ । घाइते सबैको अवस्था सामान्य रहेको प्रहरीले जनाएको छ ।आगोको मुस्लो अरिङगालको गोलोमा सल्लाउदा बित्तीकै अरिङगालले टोक्न सुरु गरेको घाइते सर्वोजित थापाले बताए । प्यूठानमा   बर्खाको समयमा अरिङगालले टोकेर मृत्यु,घाइते हुने दर्जनौ घटना घट्ने गरेको प्रहरीको भनाइ छ ।