निर्माण व्यवसायी संघ प्यूठानमा आवद्ध नेकपा माओवादी केन्द्र निकट व्यवसायीहरु बाहिरिएको घोषणा गरेका छन् । पाँचौ अधिवेशन अन्तर्गत आइतवार बिहानसम्म सर्व सहमति गराउने अभियान अनुरुप हालको नेतृत्वले निर्वाचनमा ढिलाई गरेको र मनोमानी ढंगले गोजिबाट पद बाँडफाँड गरेको आरोप लगाउँदै आफूहरु प्रतिपक्षमा बस्ने निर्णय गरेको व्यवसायी मुकेश थापाले बताए ।

अरुको अस्थित्व स्विकार्न एमाले, कांग्रेस लगायत निकट व्यवायीहरु सहमत नभएकाले मताधिकार भएका १३ जना सहित आफूहरु बाहिरीएको उनले जानकारी दिए । बाहिरिएका निर्माण व्यवसायीहरुले पद बाँडफाँड लगायत संस्थागत विविध गतिविधिका विषयमा टिप्पणी गरेका छन् । पाँचौ अधिवेशन तथा दशौं साधारण सभा शनिवारदेखि सुरु भएको हो ।

‘हामीले जतिसक्दो समावेश गर्ने प्रयत्न गरेका हौं’ हाल नेतृत्वमा रहेका एक व्यवसायीले भने, ‘आफूखुसी बाहिर गएकाहरुलाई टिप्पणी गर्नु छैन, अझै आउनुभए समावेश गरेर लैजान सकिन्छ ।’ उनका अनुसार निर्वाचन प्रक्रियामा जानुभन्दा सहमतिय ढंगबाट सँगै जाउँ भन्ने हेतुले नेतृत्व चयनमा केहिँ ढिलाई भएको जनाए । माओवादी निकट बाहेक अन्य व्ययवसायीहरुबाट सहमतिय ढंगबाट नेतृत्व चयनका लागि छलफल भइरहेको बताइएको छ ।