प्यूठानको माण्डबी गाउँपालिकाले स्थानीय पाठ्यक्रम निर्माण गर्न थालेको छ । ‘हाम्रो माण्डवी हाम्रो गौरब’ भन्ने मुख्य नारा बनाएर स्थानीय पाठ्यक्रम आधारभूत तह कक्षा १ देखि ८ सम्मको तयार गर्न थालिएको माण्डवी गाउपाँलिका शिक्षा युवा तथा खेलकुद शाखा प्रमुख तुल्सी कार्कीले जानकारी दिए ।

पाठ्यक्रमा समेटिएको विषय क्षेत्र र मुख्यमुख्य थिमबारे आज गाउँपालिकाले सरोकारवालाहरुसंग अन्तरक्रिया कार्यक्रम गरेर जानकारी गराएको छ । अन्तरक्रियामा आएका सुझावहरुलाई समेटिएर केहि दिनमै पालिकाको आफ्नै पाठ्यक्रम तयार र आगामी शैक्षिक सत्रदेखि लागु हुने गाउँपालिकाका प्रमुख प्रशासकीय अधिकृत शिशिर रिजालले जानकारी दिए ।

पालिकाले तयार पार्दै गरेको पठ्यक्रममा माण्डवीको पहिचान, हाम्रो संस्कृत इतिहास र पर्यटन, जीवन उपयोगी सिप र मूल्य शिक्षा, स्थानीय पेसा व्यवसाय र प्रविधि, हाम्रो वातावरण, दुर्घटना तथा विपद् व्यवस्थापन र हाम्रो व्यक्तित्व, असल बानी व्यवहार र सामाजिक संघसस्थाहरु, मुख्य क्षेत्रहरु समेटिएका छन् ।

यी वियय र क्षेत्रहरु माथि अन्तरक्रियामा सहभागिहरुले तीन वटा समूह मार्फत सुझाव दिएका थिए । गाउँपालिकाका प्रमुख प्रशासकीय अधिकृत शिशिर रिजालको अध्यक्षतामा भएको कार्यक्रममा गाउँपालिका अध्यक्ष श्रीधर रोका, उपाध्यक्ष मुगा पुन, वडाध्यक्षहरु र माण्डवीमा क्रियाशिल राजनीति दलहरुका प्रमुख तथा प्रतिनिधि, सञ्चारकर्मी लगायतको उपस्थीति रहेको थियो ।