प्यूठान नगरपालिका ५ झाक्रिगाउँको नेपाने सक्रिय युवा समुहले आफ्नो १८औं बार्षिक उत्सव मनाएको छ । क्लबले सोही अवसरमा वडा स्तरीय पुरुष तथा महिला भलिबल प्रतियोगिता सञ्चालन गरेको हो । सो कार्यक्रममा बोल्दै  ५ नं वडाध्यक्ष नन्दे पुन मगरले क्लबमा नरहे पनि आफ्नो तर्फबाट हुने साथ र सहयोगमा सधै रहने प्रतिवद्धता जनाएका छन् ।

कार्यक्रमका प्रमुख अतिथि प्यूठान नगरपालिकाका नगर प्रवक्ता तथा प्यूठान नगरपालिका ३ का वडाध्यक्ष सुमनराज श्रेष्ठले प्यूठान नगरपालिका ५ को झाक्री गाउँ आफैमा महत्व बोकेको ठाउँ भएकाले यसको विकासका लागि वडाले यसलाई विकासको लयमा लैजान जोड दिए । साथै खेल क्षेत्र मात्र नभई कृषि, स्वास्थ्य, शिक्षा, यातायात लगायत सिंगो वडाको समेत विकास गर्नका लागि गुरुयोजना बनाउन आवश्यक रहेको बताए ।

नेपाने सक्रिय युवा समुहकी अध्यक्ष लिला पुन मगरको अध्यक्षतामा सञ्चालन भएको कार्यक्रममा प्रमुख अतिथि प्यूठान नगरपालिका ३ का वडाध्यक्ष सुमनराज श्रेष्ठ, बिशेष अतिथिमा ५ नं वडाध्यक्ष नन्दे पुन मगर रहेका थिए । क्लबका सदस्य सागर पुन मगरले सञ्चालन गरेको कार्यक्रममा स्वागत मन्तव्य प्रविन पुन मगरले राखेको कार्यक्रम संयोजक श्यामसर पुन मगरले जानकारी दिए । साविकको वडा स्तरिय भलिबल प्रतियोगितामा आयोजक टिम सहित पुरुष तर्फ २६ टिम र महिला भलिबलमा आयोजक सहित ११ टिम रहेका छन् ।