प्यूठान नगरपालिकाको आयोजनामा गणतान्त्रिक खेलमैदानमा भएको पाँचौँ राष्ट्रपति रनिङ शिल्ड प्रतियोगिताको विजेता मुक्ति मा.वि.रातामाटा बनेको छ ।

शनिवार सम्पन्न अन्तर विद्यालय स्तरीय रनिङ शिल्डमा २४ स्वर्ण ,६ रजत ५, कास्य गरी  कुल ३५ पदकसहित मुक्ति मावि प्रथम भएको हो । मुक्ति मावि लाई पछ्याउँदै ९ स्वर्ण, १३ रजत, १३ कास्य गरी ३५ पदक सहित जनता मा.वि. बाग्दुला द्वितीय भएको छ। भने, ७ स्वर्ण, ४ रजत, ७ कास्य गरी १८ पदक सहित बालबिद्या मा.वि. मजुवा तृतीय भएको छ ।

बिहीबारदेखि शनिवारसम्म सञ्चालित प्रतियोगितामा प्यूठान नगरपालिका भित्रका १२ सामुदायिक र ४ संस्थागत गरी १६ विद्यालय सहभागी रहेका थिए । रनिङ शिल्ड प्रतियोगितामा ५५ स्वर्ण, ५४ रजत, ५३ कास्य गरी कुल १६२ पदकका लागि १६ विद्यालय विचमा प्रतिस्पर्धा भएको हो ।

लुम्बिनी प्रदेशका शहरी विकास तथा खानेपानी मन्त्री सरोज थापाले उद्घाटन गरेको उक्त प्रतियोगिताको समापन प्यूठान नगरपालिकाका नगरप्रमुख विष्णु बहादुर योगीले गरेका हुन । प्रतियोगिताको समापन गर्ने क्रममा विजेता टोलीलाई बधाई दिँदै मेयर योगीले खेल सम्पन्न गर्न भूमिका खेल्ने खेल प्रशिक्षक, खेलाडी, सहभागी विद्यालय र सबैलाई धन्यवाद दिएका थिए ।