भानु सामुदायिक अध्ययन केन्द्र प्यूठान नगरपालिका –३ ले नयाँ तथा पुराना किताबहरु संकलनका लागि समिति गठन गरेको छ । केन्द्रले संविधान सभा सदस्य नारायण प्रसाद अधिकारीको संयोजकत्वमा ५ सदस्यीय समिति गठन गरेको हो ।

प्यूठान जिल्लाको सबैभन्दा पुरानो पुस्तकालय भानु सामुदायिक अध्ययन केन्द्रले नयाँ तथा पुराना किताबहरु संकलन गरी व्यवस्थित गर्नको लागि समिति गठन गरेको समितिका सदस्य तथा प्यूठान नगरपालिका –३ का वडाध्यक्ष सुमनराज श्रेष्ठले जानकारी दिए । उनका अनुसार भानु सामुदायिक अध्ययन केन्द्रको बार्षिक साधारण सभामा भएको छलफलले समिति गठन गर्ने निर्णय गरेको थियो ।

समितिको सदस्यहरुमा प्यूठान नगरपालिकाका संस्थापक नगरप्रमुख अर्जुन कुमार कक्षपति, जिल्ला शिक्षा विकास तथा समन्वय इकाई प्यूठानका प्रमुख दुर्गा बहादुर खड्का, प्यूठान नगरपालिका ३ का वडाध्यक्ष सुमनराज श्रेष्ठ, भानु सामुदायिक अध्ययन केन्द्रका अध्यक्ष सिमन्त न्यौपाने रहेका छन् ।