जिल्ला प्रहरी कार्यालय प्यूठानले प्यूठानबाट आवेदन दर्ता गराएका उम्मेदवारहरुको प्रहरी जवान छनौट परिक्षा अभिमुखीकरण कार्यक्रम गरेको छ । मंगलबार जिल्ला समन्वय समितिको सभाहलमा संञ्चालन गरिएको कार्यक्रममा पुरुष ८५ महिला ७१ गरी १ सय ५६ जना उम्मेदवारहरुका लागि अभिमुखीकरण गरिएको जिल्ला प्रहरी कार्यालय प्यूठानले जनाएको छ ।

कार्यक्रममा भर्ना छनौट अन्तरगत शारीरिक तन्दुरुस्ती तथा बाधापार परिक्षाको नमूना अभ्यास प्रदर्शन गराउनुका साथै प्रहरी जवानको पाठ्यक्रम, लिखित परीक्षाको नमूना प्रश्न पत्र समेत समेटिएको प्रस्तुतिकरण र तालुक नेपाल प्रहरी प्रधान कार्यालयबाट निर्मित प्रारम्भिक स्वास्थ्य परिक्षण तथा शारीरिक तन्दुरुस्ती परिक्षण सम्बन्धी भिडियो प्रदर्शन गरिएको थियो ।

कार्यक्रममा प्रमुख अतिथि समेत रहेका जिल्ला प्रहरी कार्यालय प्यूठानका कार्यालय प्रमुख इश्वर थापाले उम्मेदवारहरुलाई परिक्षामा सहभागी हुन सहजताको लागि कार्यक्रम आयोजना गरिएको बताउदै सफलताका लागि सकरात्मक सोच तथा निरन्तरको अभ्यास आवश्यक हुने बताएका थिए । साथै नेपाल प्रहरीले प्रदान गर्ने सेवाका बारेमा समेत कार्यालय प्रमुख थापाले जानकारी गराएका थिए ।