प्युठानमा पानी चुहिएर २ घर भत्किएका छन् । गौमुखी गाउँपालिकामा एक र स्वर्गद्वारी नगरपालिकामा एक घर भत्किएको जिल्ला प्रहरी कार्यालय प्युठानले जनाएको छ ।

बिहीबारदेखि निरन्तर आएको वर्षाका कारण पानी चुहिएर दुई घरहरू भत्किएको जिल्ला प्रहरी कार्यालय प्युठानका सूचना अधिकारी प्रहरी निरीक्षक केशव के.सी.ले जानकारी दिए । उनका अनुसार गौमुखी गाउँपालिका–३ कोरबाङका विष्णु सेन र स्वर्गद्वारी नगरपालिका–३ धापधाराका तेज बहादुर नेपालीको कच्ची घरमा पानी चुहिएर भत्किएको हो ।

पीडितहरूलाई उद्धार गरी आफन्तको घरमा राखिएको छ ।

त्यस्तै, इलाका प्रहरी कार्यालय भिंग्रीको प्रहरी ड्युटी बस्ने पोष्ट, पर्खाल र भरिएका हतियारहरू खाली गर्ने ठाउँ समेत भत्किएको छ ।

वर्षाका कारण पहिरो जाने, लेदो झर्ने हुँदा प्युठानका अधिकांश सडक अवरुद्ध रहेका छन् ।