प्यूठान,  जिल्लाका ग्रामीण क्षेत्रमा  भइरहेका सामाजिक समस्याका बारेमा प्रमुख जिल्ला अधिकारी रमा आचार्य(सुवेदी)ले स्थानीयसँग छलफल थालेकी छन् ।  जिल्लाका दुर्गम क्षेत्रमा पुगेर सामाजिक समस्या बारे सचेतना अभियान सञ्चालन गर्न थालिएको आचार्यले बताइन ।

भदौ अन्तिम साता प्रजिअको रूपमा प्यूठान आएकी आचार्यले मङ्गलवार प्यूठान नगरपालिका–५ जुम्रीकाँढा स्थित ठुलो गाउँका स्थानीय किशोर, किशोरी, उनीहरूका अभिभावकसँग छलफल अन्तरक्रिया गरेकी छन् । बालविवाह, महिला हिंसा, घरेलु हिंसा लगायत मदिराले निम्त्याउने समस्याहरूको बारेमा छलफल गरिएको प्रमुख जिल्ला अधिकारी आचार्यले जानकारी दिइन । उनले यस्तो अभियान स्थानीय तहसँगको समन्वयमा जिल्लाका सबै स्थानीय तहका दुर्गम बस्तीमा पुग्ने योजना रहेको सुनाइन् ।

‘गाउँको अवस्था र समस्याहरू बुझेर समाधानका प्रयत्न थालेका छौ’ उनले भनिन्, ‘सामाजिक समस्याहरूलाई न्यूनीकरण गर्न समुदायलाई पहिले तयार पार्नु पर्छ ।’ समाजको अन्धविश्वास, अशिक्षा हटाउँदै बहस र पैरवीका माध्यमबाट समस्याहरू समाधान गर्न सकिने प्रजिअले विश्वास व्यक्त गरिन् । पछाडि परेको वर्गमा समुदायको बस्तीमै पुगेर गरिएको कार्यक्रम निकै प्रभावकारी भएको प्यूठान नगरपालिका वडा नम्बर ५ का वडाध्यक्ष नन्द बहादुर पुनले बताए ।

जिल्लामा आत्महत्या, बालविवाह, घरेलु हिंसा, बालिका आमा बन्ने समस्याहरू रहेका छन् । छलफल कार्यक्रममा प्रमुख जिल्ला अधिकारी आचार्य सहित जनप्रतिनिधि, प्रहरी, कर्मचारी, स्थानीय अगुवाहरू समेतको सहभागिता रहेको थियो । सहभागीहरूले बालविवाह, महिला हिंसा, घरेलु हिंसा लगायत सामाजिक समस्याहरूलाई समाधानका लागि सबैको ऐक्यबद्धता आवश्यकता रहेको बताए ।