प्यूठानको सबैभन्दा लामो पुल अर्खा–रजवारा जोड्ने ३ सय ६५ मिटर लामो झोलुङ्गे पुलको निर्माण थालिएको छ ।

गौमुखी गाउँपालिका अर्खाको लामिडाँडा र रजवाराको देउराली जोड्ने झोलुङ्गे पुल निर्माण गर्न आज साइट क्लियर बनाउने काम सुरु भएको गौमुखी गाउँपालिकाका उपाध्यक्ष महाविर रानामगरले जानकारी दिए । शहरी विकास मन्त्रालय, स्थानीय पुर्वाधार विभाग अन्तर्तगत सस्पेन्सन ब्रिज डिभिजन काठमाडौंले अधिकारी-अपर तामाकोसी जेभिलाई पुल निर्माणको ठेक्का दिएको हो । पुल निर्माणको काम जेठ मसान्त सम्ममा सक्ने गरी सम्झौता गरिएको हो । ३ सय ६५ मिटर लम्बाई र १ सय ८० मिटर उचाई रहने उक्त पुलका लागि संघीय सरकारले ३ करोड ७५ लाख रुपैयाँ बजेट सुनिश्चित गरेको छ । पुल निर्माणले आवतजावत संगै पर्यटन क्षेत्रमा टेवा पुग्ने स्थानीयको विश्वास छ ।