शैक्षिक गुणस्तर वृद्धि गर्न सामुदायिक विद्यालयहरूको अनुगमन थालिएको छ । सामुदायिक विद्यालयको शैक्षिक स्तर बढाउने उद्देश्यले अनुगमन थालिएको शिक्षा विकास तथा समन्वय इकाई प्यूठानले जनाएको छ । पहिलो चरणमा मल्लरानी, माण्डबी गाउँपालिका र प्यूठान नगरपालिकाका विद्यालयहरुमा अनुगमन सकिएको शिक्षा विकास तथा समन्वय इकाई प्यूठानका प्रमुख दुर्गा बहादुर खड्काले जानकारी दिए । इकाई प्रमुख खड्का नेतृत्वको विज्ञ सहितको टोलीले विद्यालयको अनुगमन गरेका हुन् ।

माण्डवी गाउँपालिकाको सुन्नानी आधारभूत माध्यमिक विद्यालय माण्डवी –२ मर्कावाङ, गणेश आधारभुत विद्यालय माण्डवी–२ ढिकावन,अरुणा भवानीश्वरी प्राथमिक विद्यालय माण्डवी–१ कुमालटार र भवानीश्वरी आधारभूत विद्यालय माण्डवी –३ जस्पुरको अनुगमन गरेको हो । त्यस्तै प्यूठान नगरपालिकाको शारदा माध्यमिक विद्यालय प्यूठान नगरपालिका –३ सापडाँडा, नेपाल राष्ट्रिय माध्यमिक विद्यालय प्यूठान न.पा.–४ टारी र क्षेत्र विकास माध्यमिक विद्यालय प्यूठान न.पा.–७ पुण्यखोलाको अनुगमन गरेको थियो । मल्लरानी गाउँपालिकाभित्र रहेका विभिन्न सामुदायिक विद्यालयहरुको अनुगमन गरीसकेको प्रमुख खड्काले जानकारी दिए । बाँकी रहेका स्थानीय तहका विद्यालयहरुको क्रमश अनुगमन गरिने उनले बताए ।

विद्यालयमा विद्यमान समस्या र विद्यालयको शैक्षिक गुणस्तर वृद्धिको बिषयमा प्रधानाध्यापक तथा शिक्षकहरूसँग समस्या समाधानका लागि छलफल समेत गरिएको थियोे। विद्यार्थीको शैक्षिक स्तर वृद्धि गर्न सबैभन्दा पहिले सानो कक्षाको जग बलियो बनाउनु पर्ने सुझाब दिइएको खड्काले बताए । सामुदायिक विद्यालयहरुको आन्तरिक मुल्यांकनको पाटो कमजोर रहेकाले आन्तरिक मुल्यांकन फाराम प्रभावकारी बनाउन सुझाब दिएको उनले जानकारी दिए ।

विद्यालयमा भएका सामग्री र उपकरणको उपयुक्त ढङ्गले प्रयोग र संरक्षण हुन नसकेको र सूचना प्रविधिको प्रयोग राम्रोसंग नभएको, अभिभावकसँग विद्यार्थीको सिकाइ उपलब्धि र विद्यालयको विकासबारे नियमित छलफल र अन्तव्रिर्mया नभएको जस्ता कमीकमजोरी पाइएकाले सुधार गर्न सुझाब दिईएको छ ।

सामुदायिक विद्यालयहरुले निजी विद्यालयहरुसँग प्रतिस्पर्धा गर्न र शैक्षिक गुणस्तर वृद्धि गर्नका लागि विद्यार्थीहरुलाई अंग्रेजीमा दक्ष बनाउन आवश्यक अनुगमन टोलीले सुझाब दिएको छ । शिक्षा विकास तथा समन्वय इकाई प्यूठानका प्रमुख दुर्गा बहादुर खड्का, शिक्षा विकास तथा समन्वय इकाई प्यूठानका पूर्व प्रमुख शिवराज पण्डित,बिषय विज्ञ शिक्षकहरु खिम बहादुर राउत (नेपाली),केशवराज पण्डित (गणित र विज्ञान ) र छत्र बहादुर धामी क्षेत्री (अंग्रेजी),कार्यालयका प्राविधिक सहायकहरु नर बहादुर खड्का,महेन्द्र कुमार सिंह कुर्मी,पत्रकार लगायतको उपस्थिति थियो ।