नौबहिनी गाउँपालिकाले आ.व. २०८१÷०८२ को वार्षिक समीक्षा तथा सार्वजनिक सुनुवाई कार्यक्रम सम्पन्न गरेको छ । स्थानीय निकाय र नागरिकहरु बिच दोहोरो संवाद स्थापित गरि सार्वजनिक सेवा प्रवाहलाई थप प्रभावकारी बनाउन सोमबार पालिकामा कार्यक्रम गरिएको हो।

स्थानीय निकायबाट सञ्चालित विकास कार्यक्रम, उपलब्ध सेवा, बस्तु र सुविधा सर्वजनिक गरि सेवाग्राही नगारिकले उठाएका सवालहरुमा स्पष्टता, पारदर्शिता गराउन र रचनात्मक सुझावहरुलाई ग्रहण गरि आगामी कार्ययोजना चुस्त बनाउनका लागि कार्यक्रमको आयोजना गरिएको गाउँपालिका अध्यक्ष दिल बहादुर थापाले बताए ।

नौबहिनी गाउँपालिकाले यस आ. व. २०८१÷०८२ मा चालूतर्फ ९३.५१ र पुँजीगततर्फ ९६.९२ प्रतिशत खर्च कायम गरि जिल्लामै उत्कृष्ट स्थान हासिल गरेको दाबी गरेको छ । गाउँपालिकाको २०८१÷०८२ को वार्षिक समीक्षा कार्यक्रमको अवसरमा प्रमुख प्रशासकीय अधिकृत  शिवराज पौडेललाई पालिकामा पुर्याएको योगदान,सेवा, कुशल कर्मचारी व्यवस्थापन, सेवा प्रवाहको प्रभावकारिता, बजेट व्यवस्थापन गरेको भन्दै पालिकाले सम्मान गरेको छ ।

  कार्यक्रममा पत्रकार महासंघका पूर्व केन्द्रिय सदस्य सुशील पोख्रेल र महासंघका पूर्व जिल्ला अध्यक्ष गिरुप्रसाद भण्डारीले गाउँपालिकाले गरेको विकास निर्माण र नतिजाको प्रसंशा गर्दै महत्वपूर्ण सुझावसङ्गै बधाई  दिएका थिए ।

कार्यक्रममा पालिकाका सबै शाखा, ८ वटै वडा सचिवहरुले वार्षिक प्रगति प्रतिवेदन प्रस्तुत गरेका थिए । स्थानीय राजनीतिक दलका प्रमुख तथा प्रतिनिधि, स्थानीय नागरिकहरुले गाउँपालिकाको दिगो विकास निर्माण, कृषिमा आत्मनिर्भर, वडाबासीहरु सडकको पूर्ण पहुँच, विद्युत र खानेपानीसंगै शिक्षा र स्वास्थ्यमा उत्कृष्ट नतिजा ल्याउन सहकार्य र समिक्षा गोष्ठीहरु निरन्तर हुन जरुरी रहेको बताए ।