प्यूठान जिल्लाका २८ प्रतिशत किशोरीहरूमा रक्तअल्पता (एनेमिया) को समस्या देखिएको छ। स्वास्थ्य कार्यालय प्यूठानका अनुसार किशोरीहरूले नियमितरूपमा आइरन चक्की र पोषिलो खाना नखाँदा जिल्लामा यो समस्या जटिल बन्दै गएको हो ।
विशेष गरी जिल्लाका दुर्गम ग्रामीण क्षेत्रको तुलनामा सुविधायुक्त र सहरी क्षेत्रका किशोरीहरूमा रक्तअल्पता बढी देखिएको स्वास्थ्य कार्यालय प्यूठानका तथ्याङ्क फोकल पर्सन कौशलराज वैद्यले जानकारी दिए। उनका अनुसार सहरी क्षेत्रका किशोरीहरुले जंङफुड बढी प्रयोग गर्ने गर्दा यस्तो समस्यमा देखिएको हो ।

स्वास्थ्य कार्यालय र स्थानीय तहमार्फत जिल्लाका विद्यालयहरूमा किशोरीहरूलाई खुवाउनका लागि नियमित रूपमा आइरन चक्की वितरण गरिँदै आएको छ । तर, किशोरीहरूले उक्त चक्की प्रभावकारी रूपमा सेवन नगरेको पाइएको फोकल पर्सन वैद्यले बताए । “हामीले विद्यालयमार्फत आइरन चक्की पु¥एका छौँ,“ वैद्यले भने, “तर किशोरीहरूले यसलाई नियमित रूपमा सेवन नगर्दा सोचेजस्तो सुधार आउन सकेको छैन्।” किशोरी अवस्थामा हुने रक्तअल्पताले उनीहरूको शारीरिक तथा मानसिक विकासमा गम्भीर असर पु¥याउने स्वास्थ्यकर्मीहरू बताउँछन् । यसले किशोरीहरूको चौतर्फी विकास नै रोकिन सक्ने भएकाले यसलाई गम्भीर स्वास्थ्य समस्याका रूपमा लिनुपर्ने स्वास्थ्य कार्यालयको भनाइ छ ।

किशोरीहरूलाई स्वस्थ राख्न र उनीहरूलाई नियमित रूपमा आइरन चक्की खुवाउने वातावरण सिर्जना गर्न अब स्थानीय तहले विशेष कदम चाल्नुपर्ने र यसमा स्थानीय सरकारको भूमिका सबैभन्दा बढी हुने स्वास्थ्य कार्यालय प्यूठानले जनाएको छ।