आर्थिक अभावका कारण उपचार गराउन नसकेर समस्यामा परेका प्यूठानको मल्लरानी गाउँपालिका वडा नं. १ अरबाङका शंकर परियारको बिभिन्न सहयोगदाताहरुको सहयोगमा टिचिङ हस्पिटल काठ्माण्डौंमा अप्रेशन हुनेभएको छ।
बिभिन्न सहयोगदाताहरुको सहयोगमा आइतबार उनको अप्रेशन हुने बिरामी शंकर परियारका दाजु सागर परियारले जानकारी दिनुभयो। शंकर परियारको बिषयमा समाचार प्रकाशन भएपछि विभिन्न सहयोगदाताहरुको सहयोगमा उनको उपचार सम्भव भएको हो।

गाउँनै सहयोगमा
आफ्नै छिमेकी वडाको १५ बर्षिय बालकले उपचार नपाएर बिचल्लीमा परेको समाचार देखेपछि मल्लरानी गाउँपालिका वडा नं. २ का स्थानिय यम बहादुर के.सीको नेतृत्वमा ५१ हजार ४ सय ५६ रुपैयाँ संकलन गरेका छन्। “छिमेकी वडाको भाईको अबस्थाको बिषयमा समाचार पढँे” यम बहादुर केसीले भन्नुभयो–“पैसाको अभावले मर्न त दिन हुन्न भन्ने लाग्यो छिमेकी भाई जुमान सिंह नेपाली, बल बहादुर के.सीलाई भनेर गाउँभरीबाट सक्दो सहयोग उठाउन लागेर सहयोग गरेको हो। आफुले दुई हजार सहयोग गरेपछि अन्य गाउँका धेरै मान्छेले सहयोग गर्नुभयो।” समाजसेवी के.सीले भन्नुयो। मल्लरानी गाउँपालिका वडा नं. २ का ६० जनाबाट उक्त रकम उठेको हो।

हालसम्म उनको उपचारकाे निम्ती ८२ हजार ४ सय ६५ रुपैया स‌कलन भएको छ।