गौमुखी गाउँपालिका प्यूठानको अर्खा माध्यामिक विद्यालयका शिक्षक तथा कर्मचारीहरुले विद्यार्थीहरुलाई जुट कार्पेट किनेर पढाउन थालेका छन् । कोरोना संक्रमणको दर घटेसँगै विद्यालयमा पढाई सुचारु हुँदा विद्यार्थीहरुको चाँप बढेपछि शिक्षकहरुले २ दिनको तलव भत्ता खर्च गरी कार्पेट र पिम्याट किनिदिएका हुन् । कक्षा ९ मा विद्यार्थी संख्या बढेपछि सेक्सन खोल्नुपर्दा बेन्च डेस्क नहुँदा कार्पेटमा बसालेर पढाउन थालिएको प्रधानाध्यापक लिलु प्रसाद पौडेलले बताए ।

विद्यालयमा ९ सय ६ जना विद्यार्थी भर्ना भएका छन् । कक्षा ९ मा १ सय जना पुगेका छन् । यहाँ कक्षा ६, ७ र ८ मा पनि सेक्सन खोलिएको छ । शिक्षक र कर्मचारी बाहेक स्थानीय ब्यापारी र जनप्रनिधिहरुबाट समेत सहयोग मागेको प्रधानाध्यापक पौडेलको भनाई छ ।

राज्यको शैक्षिक नीति अनुसार विद्यार्थी भर्ना संख्याको चापको आधारमा शिक्षक दर्वन्दि मिलान र भौतिक पुर्वाधारको प्रयाप्त व्यवस्था नहुँदा यहाँ नियमित पठनपाठनमा समस्या रहेको विद्यालय व्यवस्थापन समितिका अध्यक्ष दिलबहादुर थापाले बताए । गौमुखी गाउँपालिका भित्रका ६ वटा माध्यमिक विद्यालय मध्ये विद्यार्थी संख्या बढि चाँप हुने विद्यालय यही हो । विद्यार्थीको चाँपले शिक्षक दरवन्दि, भवन संख्या र डेस्क बेन्चको अभाव रहेको समितिको भनाई छ ।