भालुबाङ प्यूठान सडकमा यात्रा गर्ने यात्रु धेरैले सम्झने ठाउँ हो खहरेखोला। खहरेको पहिरोका कारण धेरैले सास्ती व्यहोरेका छन् भने गाडीमै रात कटाएका पनि छन् । त्यही खहरे पारी देखिने सुन्दर गाउँ सरुमारानी गाउँपालिका ४ स्थित छत्तिवनका स्थानीयले पनि माडी नदिका कारण वर्षौवर्ष दुःख पाइरहे । नदि तर्दा दर्जनौको ज्यान गयो, धेरै पौडेर बाँचे ।

केहि वर्ष पहिलेसम्म निकै दुःखका साथ गाउँ पुग्नु पथ्र्याे उनीहरुलाई । माडि नदि पार गर्न निकै जोखिम थियो । हिउँद बर्खामा नै धेरै सास्ती थियो । तर, हिजोआज उनीहरुका दिन फेरिएका छन् । यहाँ स्थित छत्तिवन घाटमा झोलुङ्गे पुल निर्माण भएको छ । यसले गर्दा भालुबाङ प्यूठान सडकबाट यात्रा गरेर गाडीबाट झरेपछि स्थानीय १० मिनेटमै सहज रुपमा गाउँ पुग्न सक्छन् । उनीहरुलाई खोलाले बगाउलाकी भन्ने त्रास पनि छैन अहिले । गाडी भेटाउन सडकमा आउन पनि १० मिनेट भन्दा बढि समय लाग्दैन । बस्तुभाउलाई स्याउला, दाउरा गर्न जंगल गएर फर्कन पनि सहज छ । पुलले गाउँलाई जिल्लाको मुख्य सडक सञ्जालसंग जोडेको छ ।

पुल निर्माणले आफूहरुको दिनचर्या नै फेरिंदीएको स्थानीय बताउँछन् । हिजोआज यहाँ पाकेको गहुँबालीले गाउँलाई गहना लगाए झै सुन्दर बनाएको छ । वारीबाट खहरे–गर्जेनी क्षेत्रबाट हेर्ने जो कोहिलाई पनि पारी पुगु–पुगु झैं हुन्छ ।