ऐरावतीमा खोलाले बगाउॅदा एक जना बालक बेपत्ता भएका छन् । ऐरावती गाउँपालिका ५ स्थित जाडिखोलाले बगाउँदा स्थानीय ५ वर्षीय शुशन केसी बेपत्ता भएका हुन् । बुवा विष्णुबहादुर केसीसंग हिजो दसैंका दिन खोला तर्नेक्रममा बालकलाई खोलाले बगाएको प्रहरीले जनाएको छ ।
ऐरावती ५ झिबाङ निवासी केसीलाई हर्नाघाटनबाट घर फर्कनेक्रममा खोलाले बगाएको जिल्ला प्रहरी प्रमुख डिएसपी विष्णु खड्काले जानकारी दिए । अस्ति रातिदेखि परेको अविरल वर्षाका कारण जिल्लाको मुख्य प्रवेशद्धार भालुबाङ-प्यूठान सडक अवरुद्ध छ । सडक खुलाउने प्रयास भैरहेको प्रहरीले जनाएको छ ।
जिल्लाका भित्री सडकहरु बाग्दुला-मच्छि, बाग्दुला-बहाने, खलंगा- चुजाठाटी लगायत सडकहरु समेत अबरुद्ध छन् । स्थानीय सरकारसंग समन्वय गरेर सडक खुलाउने प्रयास भैरहेको प्रमुख जिल्ला अधिकारी सुनिता नेपालले जानकारी दिइन । माडी, झिमरुक, जुम्री लगायत नदि तथा खोलामा पानीको बहाब निकै बढेको छ ।