प्यूठान नगरपालिका ४ बिजुवार स्थित भौका हँुदै मुख्य बजार प्रवेश गर्न भौका रोडमा यात्रागर्ने यात्रु हिलो,धुलो, र चिप्लोले सधै हैरान छन । मुख्य सडक जाम हुँदा बैकल्पिक सडककोरुपमा प्रयोग हुने सडक सुधारमा स्थानीय सरकार,सडक डिभिजन कार्यालय र सडक पूर्वाधार कार्यालयको नजर पुगेको छ । संघन सहरी तथा भवन निर्माण आयोजना र भवन कार्यालय दाङले समेत यो मुख्य बजारको सडक सुधारमा ध्यान दिन सकेका छैनन् ।

जिल्लाको पुरानो व्यापारी केन्द्र, बिजुवारको पुरानो सडक निर्माण गर्ने भन्दै सरोकारवाला निकायले पटक–पटक आएर नापनक्सा गरेपनि बजेट विनियोजन गरेर सडक सुधार गर्नतर्फ कसैको ध्यान नपुगेको स्थानीयको गुनासो छ । भौकाको पिपल रुखदेखि ओरालो क्षेत्र निकै अफ्ठ्यारो छ । साना गाडिहरु गुड्न निकै समस्या भइरहन्छ । दर्जनौ मोटरसाइकल सवार यात्रु लडेका छन् । टारी क्षेत्रका घरहरुको नालीबाट आउने पानीको भल सडकमा यत्रतत्र बग्दा सडक दिन प्रतिदिन जिर्ण भैरहेको छ । भौका देखि झिँमरुक खोला झोलुंगे पुलसम्म सडक कालोपत्रे गर्ने भनेर नापनक्सा भएरपनि काम नभएको स्थानीय शुशिल कर्मचार्यले गुनासो गरे । प्यूठान नगरपालिकाको मुख्य प्रशासनीक केन्द्र रहेको वडा क्षेत्र सबैको नजर पुग्ने सडकको हालतप्रति नगरपालिकाले मर्मत गर्न पहल थालेको छैन् ।