प्यूठानमा कफी खेतीको सम्भावना  कति ? 

पछिल्लो समय प्यूठानमा कफि खेती गर्ने किसानहरुको संख्यामा बृद्धि हुन थालेको छ । प्यूठानको सरुमारानी, मल्लरानी, गौमुखी, ऐरावती, झिमरुक गाउँपालिका लगाएतका स्थानहरुमा कफिखेति गर्ने किसानहरुको आकर्षण बढेको हो ।गौमुखी गाउँपालिका ६ लिवाङका पदम बहादुर केसी कफी खेति विस्तार गर्ने सोचमा छन । उनले कफिको राम्रो सम्भावना देखेर २० हजार विरुवा उत्पादन गर्ने सोचमा रहेको बताए ।

जिल्लाको मल्लरानी, गौमुखी, झिमरुक, ऐरावती र सरुमारानी गाउँपालिकाका केही स्थानमा कफी खेति विस्तार गरिएको प्रधानमन्त्री कृषि आधुनिकीकरण परियोजना परियोजना कार्यान्वयन इकाई धान जोन प्यूठानका प्रमुख चुमानसिह गिरीले बताए । उनले भने,‘ किसानहरुलाई कफीखेती सम्बन्धी तालिमहरु संचालन गरेर यसतर्फ आर्कषित गराउन सकियो भने खेर गएका बाझो जमिनलाई उपयोग गरी जिल्लाका धेरै जसोे स्थानमा कफिखेति गर्न सकिन्थ्यो र यसबाट किसानहरुलाई स्वरोजगार बनाउन सकिन्थ्यो ।’

जिल्लामा करीब १० हेक्टर क्षेत्रफलमा ४५ जना किसानहरुले व्यवसायीक कफिखेती गर्दै आएका छन् । समुद्री सतहदेखी करिब ८ सय मिटरको उचाईदेखी करिब १५ सय मिटरसम्मको उचाईमा कफी खेती हुन्छ । कफी खेती गर्ने कृषकहरुलाई कार्यालयले ५० प्रतिसत अनुदानमा विरुवाहरु वितरण गर्दै आएको पनि गिरीले बताए । कफिले एक बोटबाट १५ केजि भन्दा माथि उत्पादन दिन्छ । कफीलाई चिसोबाट जोगाउन निकै ग्राहो पर्छ । कफीलाई टनेल लगाइदिने, मलजल गर्ने र चिसोबाट जोगाउँन सक्ने हो भने यसले राम्रो आम्दानी दिने गिरीले बताए ।