नौवहिनी गाउँपालिका, प्यूठानले स्थानीय युवाहरुलाई काठको भाँडा वनाउने तालिम दिन थालेको छ । नौबहिनी गाउँपालिका प्यूठानको आर्थिक सहयोगमा इभान इन्जिनियर्स एण्ड कष्ट्रक्सन को आयोजनामा तालिम सञ्चालन भएको हो ।
पछिल्लो समय प्लाष्टिकका भाँडाहरु बढी मात्रामा प्रयोग हुँदै आएपछि काठका भाँडाहरु लोप हुँदै गएका छन् । सोही अनुरुप परम्परागत रुपमा रहेको यो पेशालाई व्यवसायिकरण गर्न गाउँपालिकाले लक्षित बर्गका समुदायका लागि तालिम गराएको इभान इन्जिनियर्स एण्ड कष्ट्रक्सनका सञ्चालक पारस भण्डारीले बताए । गाउँमै बसेर पेशा अगांल्न सक्ने यूवाहरुको लागि सीपमुलक तालिम सञ्चालन गरिएको सञ्चालक भण्डारीको भनाइ छ ।

चुँदारा टोलमा रहेका स्थानीयद्धारा धेरै पहिले पहिले काठबाट भाँडाहरु बनाउने गरिन्थ्यो तर हिजोआज त्यो काम विस्तारै लोप हुँदै जान थालेको छ । सो पेशालाई जागरुक बनाउन र लोप हुनबाट बचाउनको लागि तालिम अगाडी सारिएको ८ नं वडा अध्यक्ष मान बहादुर के.सी ले बताए । गुँरास, गिठी, काउला लगायतका काठबाट घ्यू राख्न मिल्ने हर्पे, महि राख्न चाहिने ठेकी, कोसी लगायतका भाँडाकुडाहरु बनाउदै आएका छन् । व्यवसायिक रुपमा बनाएका भाँडाहरुले बजार पाउन नसकेको समयमा वडाले बजार व्यवस्थापनको लागि सहयोग गर्ने समेत बताएको छ । साथै तालिममा सहभागिहरुले सिकेका सीपलाई व्यवसायिक रुपमा निरन्तर दिन सकेको खण्डमा एकरुपता बनाएर वडाबाट हुने सहयोग सधै रहने अध्यक्ष के.सी ले जानकारी दिए । तालिम १० गतेदखी २४ गते सम्म १५ दिनको रहने भएको छ । तालिममा १० जना सहभागि भएका छन् ।