प्यूठान अस्पतालको भिडियो एक्सरे मेसिन बिग्रेको भनेर गर्भवती महिलालाई निजी क्लिनिकमा पठाउन थालेको धेरै भयो । अझै पनि अस्पतालमा भिडियो एक्सरे चालु छैन । यसले गर्दा चर्को शुल्क तिरेर गर्भवति महिला अस्पताल बाहिरै भिडियो एक्सरे गर्न बाध्य छन् ।

गर्भवती महिला अफ्ठ्यारा सिढि पार गरेर आउ जाउ गर्नुपर्दा दुख पाइरहेका छन् । अस्पतालमा गत २०७९ असारदेखि मेसिन बिग्रेको भन्दै एक्सरे गर्ने गरिएको छैन । प्यूठान अस्पतालका चिकित्सकले बिग्रेर काम नगर्ने भनेको मेसिनले राम्रोसँग काम गर्ने अवस्थामा रहेको लुम्बिनी प्रादेशिक अस्पताल बुटवलका रेडियोलोजिस्ट डा. राजेन्द्र खनालले बताए ।

लामो समय सम्म रेडियोलोजिस्टका रुपमा अनुभवी डा. खनालले शनिवार जिल्ला अस्पताल विजुवारमा बिग्रेको भनिएको मेसिनबाट बिरामीको भिडियो एक्सरे गरेका थिए । स्वास्थ्य सेवा बिभागले २०७४ सालमा १३ लाख ३६ हजार २ सय ४० रुपैयाँ लागत मुल्यको पोर्टेवल भिडियो एक्सरे मेसिन प्यूठान अस्पताललाई प्रदान गरेको थियो ।