ऐरावती गाउँपालिका १ का वडा अध्यक्ष अमर रेश्मी मगरले वडाका हरेक कार्यक्रमहरुलाई छनोट गरेर जनतालाई सेवा प्रवाह सहज र सरल रुपले दिने बताएका छन् । झुलेनी यूनाइटेड नेटवर्क प्रा.लि ले आयोजना गरेको कार्यक्रम स्थानीय सरकार र विकासको सवाल बिषयक अन्र्तसंवाद कार्यक्रममा बोल्दै उनले यस्तो बताएका हुन् ।

वडामा थोरै बजेट हुने र भौगोलिक अवस्थाले गर्दा पनि विकासका काममा विभिन्न समस्या हुने भएकाले त्यसमा जनताले अधिकार मात्र नखोजी कर्तव्यलाई पनि सम्झेर विकास निर्माणमा सहयोग गर्नुपर्ने अध्यक्ष रेश्मीको भनाई छ । उनले भने –“हामीसँग जति चुनौती छ त्यति नै संभावना पनि छ , त्यसैले हामीले गरेर देखाउने माध्यम यहि हो ।” रेश्मीले हिजोका दिनमा मागमा आधारित , आवश्यकतामा आधारित र अधिकारमुखी विकासको माग हुन्थ्यो भने अहिले निड बेसमा फोकस भएर काम गर्नुपर्ने अवस्था छ ।

वडामा भर्ना सम्बन्धिका विषयमा पहिलेको भन्दा केही परिमार्जन गरेको तर सिकाई क्षेत्रमा केही समस्या भएको भन्दै यहाँ रहेका विद्यालयका प्रधानाध्यापकसँग बसेर छलफल गरि सिकाईका बेला हुने समस्याहरुको समाधान खोज्ने अध्यक्ष रेश्मीले बताए ।

त्यस्तै यूवाको क्षेत्रमा पहिलो बर्षमा यूवा लक्षित कार्यक्रमहरु गरेको र अबका दिनमा पनि यूवामा भएको ज्ञान, सीप, प्रविधि सबैलाई प्रयोग गरेर यूवाहरुलाई अघि बढाउने गरि तयारी गरिरहेको बताएका छन् । खानेपानीको लागि बृहत योजना बनाउने तयारीमा रहेको समेत उनले जानकारी दिए ।