जंगली जनावारलाई थापेको करेन्टको धरापमा परेर साउन महिनामा मात्रै प्यूठानमा ३ जनाको ज्यान गएको छ । जंगली जनावारबाट खेतिपाती जोगाउन भन्दै स्थानीयले लगाएको करेन्टको धरापमा परेर जिल्लाका विभिन्न क्षेत्रका ३ जनाले ज्यान गुमाएको जिल्ला प्रहरी कार्यालय प्यूठानले जनाएको छ ।

जिल्ला प्रहरी कार्यालय प्यूठानका अनुसार प्यूठान नगरपालिका वडा नं.–३ साप्डाडाँ स्थित बरपाटा बस्ने ५३ बर्षका हिम बहादुर खड्काको श्रावण १६ गते बाँदर र बँदेल धपाउन आफ्नै बारीमा थापेकोे बिद्युतिय धरापमा परि मृत्यु भएको थियो । झिमरुक गाउँपालिका ६ बस्ने ५४ बर्षका धन बहादर पुन मगरको श्रावण १७ गते स्थानीयले बँदेल धपाउन थापेको करेन्टको धरापमा परेर मृत्यु भयो ।

यस्तै श्रावण ३० गते स्वर्गद्धारी नगरपालिका ८ बर्जिवाङकी १८ बर्षिय पुजा थापाको पनि आफ्नै बारीमा लगाएको करेन्ट लागेर मृत्यु भएको जिल्ला प्रहरीका कार्यालय प्यूठानका बरिष्ठ प्रहरी नायवनिरिक्षक ओमप्रकाश चौधरीले जानकारी दिए ।

पछिल्लो समय किसानले अन्नबाली जोगाउन बारीमा करेन्ट लगाउने र त्यसमा परेर मानवीय क्षेति हुने गरेको छ । विभिन्न ठाउँमा जंगली जनावर बाँदर र बँदेलले किसानलाई सताएपछि किसान बालीनाली जोगाउन भनेर बारीमा करेन्ट थाप्ने गर्दा मानवीय क्षेति हुन थालेको प्रहरीको भनाइ छ ।

जंगली जनावरले जिल्लाको गौमुखी गाउँपालिका,नौबहिनी गाउँपालिका, प्यूठान नगरपालिका,झिमरुक गाउँपालिका र स्वर्गद्धारी नगरपालिकामा किसानको मकै बारीमा क्षति पुर्‍याएको किसानहरु बताउँछन् ।

यसरी गैर कानूनीरुपमा बिद्युतीय धराप राख्न नपाइने कुराको सचेत गराउदा गराउदै पनि घटना घटीरहेको जिल्ला प्रहरी कार्यालय प्यूठानका प्रहरी प्रमुख सुवास सड्काले बताए । ‘जिल्लाका स्थानीय तहहरुसंग समन्वय गरेर सचेतना गर्न काम गरेका छौ,’ खड्काले भने,‘यस सम्बन्धि दुई वटा मुद्दा समेत चलेको छ ।’