प्यूठान नगरपापालिकाले जेष्ठ नागरिकलाई प्रदान गर्दै आएको निःशुल्क आखाँ उपचार सेवाको उमेरहद बढाएको छ । यस अघिसम्म ६० वर्ष माथिका जेष्ठ नागरिकले आँखाको उपचार सेवा निःशुल्क दिदै आएकोमा अव यो सुविधा ६८ वर्ष उमेर पुगेकाले मात्र पाउने भएका छन् ।

नगरपालिकालाई आर्थिकभार बढि भएकाले उमेरहद बढाउनुपरेको प्यूठान नगरपालिकाका प्रमुख प्रशासकीय अधिकृत महेश गुरुङले बताए । ६८ वर्ष माथिका जेष्ठ नागरिकलाई एक वर्षसम्म सेवा प्रदान गर्नको लागि यसै भदौ ७ गते प्यूठान नगरपालिका र प्रस्तावित नरेन्द्र गायत्री आँखा अस्पताल बिजुवार बीच सम्झौता भएको छ ।

आँखा उपचारको लागि आउने ६८ बर्ष उमेर पुगेका सेवा ग्राहीले उमेर खुल्ने काजजात दिएर आएपछि सेवा पाउने छन् । अस्पतालबाट सेवा लिनको लागि सेवाग्राहीहरु स्वयं उपस्थित हुनुपर्ने, विरामी चेकजाँचको विवरण छुट्टै बनाउने लगायत कुरा उल्लेख गरि दुबै पक्षले सम्झौता गरेका छन् ।

आँखा अस्पताल बिजुवार र नगरपालिकाबीच २०८० भदौ ७ गतेदेखी २०८१ असार मसान्तसम्म मान्य हुने गरि एक वर्षको लागि सम्झौता भएको छ । सम्झौतामा विभिन्न ९ बुदाँ उल्लेख गरिएको छ । प्यूठान नगरपालिकाले बजेटको व्यवस्था गरेर २०७५ सालदेखि नगरपालिका भित्रका ६० वर्ष भन्दा माथिका जेष्ठ नागरिकलाई निःशुल्क आँखा उपचार सेवा प्रदान गर्दै आएको थियो ।