२०८० असोज २१नौबहिनी गाउँपालिका अध्यक्ष डिल बहादुर थापा मगरले गाउँटोलमा भएका घटनाहरुलाई कथा मार्फत सूचना प्रवाह गर्न सकिने बताएका छन् । शिक्षा यूवा तथा खेलकुद शाखा नौबहिनी गाउँपालिकाले आयोजना गरेको ३ दिने कथा लेखन तालिमको आज समापन गर्दै अध्यक्ष थापाले यस्तो बताएका हुन् ।
जिल्लाको दुर्गम मानिने नौबहिनी गाउँपालिकामा पनि कला साहित्य मार्फत गाउँ समाजमा भएका यथार्थ घटनाहरुलाई समेटी साहित्यमार्फत सूचना प्रवाह गर्न जोड दिए । अध्यक्ष थापाले कला साहित्यको लागि नौबहिनी गाउँपालिकाले आर्थिक बर्ष २०८०/०८१ मा ३ लाख बजेट विनियोजन गरेको समेत जानकारी दिए । साथै कथा लेखन र अन्य कला साहित्यमा अगाडी बढ्न चाहे अवसरको वातावरण गाउँपालिकाले मिलाउने समेत उनले बताए ।
शिक्षा यूवा तथा खेलकुद शाखाको आयोजनामा गत शुक्रबार देखि सुरु भएको कथा लेखन तालिम आइतबार सम्पन्न भएको हो । तालिममा दुर्गा मावि, गाबै मावि, गंगा मावि, जनज्योति मावि, लुप्लुङ मावि र अम्बिका मावि गरि ६ वटा माविका ५२ जना विद्यार्थीहरु सहभागि भएको गाउँपालिकाले जनाएको छ । तालिमको सहजिकरण बाल कथाकार बिजय राज आचार्यले गरेका थिए ।
शिक्षा यूवा तथा खेलकुद शाखा प्रमुख मेघराज बोहोराको अध्यक्षतामा सुरु भएको कार्यक्रमको प्रमुख अतिथि गाउँपालिका अध्यक्ष डिल बहादुर थापा रहेका थिए ।
