नेपाल सरकारका प्रवक्ता एवं संचार तथा सूचना प्राविधि मन्त्री रेखा शर्माले प्यूठान जिल्लामा आत्महत्याको समस्या बढी देखिएकाले नेपाल रेडक्रस सोसाइटीले सचेतनामूलक कार्यक्रम गर्न आवश्यक रहेको बताएकी छिन । बिहिबार एक कार्यक्रमकाबिच नेपाल रेडक्रस सोसाइटी बिजुवार उपशाखाको भवन उद्घाटन गर्दै उनले यस्तो बताएकी हुन् । मन्त्री शर्माले जिल्लामा सचेतनामूलक कार्यक्रम सञ्चालन गर्नका लागि सहजीकरण गर्न नेपाल सरकार लागि पर्ने बताईन । साथै उनले रेडक्रसको भवन निर्माण गर्नको लागि जग्गा उपलब्ध गराउने जग्गादातालाई धन्यवाद समेत व्यक्त गरिन ।

प्रदेश सरकार सहित विभिन्न संघसंस्था, स्थानीय तह लगायत अन्य व्यक्तिहरुको आर्थिक सहयोगमा ४३ लाख ४८ हजार २ सय ९ रुपैँयाको लागतमा भवन निर्माण सम्पन्न भएको हो । २०७९ माघ ३० गते भवन निमार्ण सम्पन्न भएको नेपाल रेडक्रस सोसाइटी बिजुवार उपशाखाका सभापति लोकमणी भण्डारीले जानकारी दिए । बिजुवार उपशाखामा १९ महिला र १३१ जना पुरुष गरि १ सय ५० जना आजीवन सदस्य रहेको समेत उनले जानकारी दिए ।

नेपाल रेडक्रस सोसाइटी बिजुवार उपशाखाका सभापति लोकमणी भण्डारीको अध्यक्षतामा सुरु भएको कार्यक्रममा प्यूठान नगरपालिकाका मेयर बिष्णु बहादुर योगी, निवर्तमान मेयर अर्जुन कुमार कक्षपती, नेपाल रेडक्रस सोसाइटी प्यूठानका जिल्ला सभापति गुमानराज पुलामी, जिल्ला अस्पताल प्यूठानका निमित्त मेडिकल सुपरिटेन्डेन्ट डा.प्रमिला खनाल, सञ्चारकर्मी लगायतको सहभागी रहेको थियो ।