प्यूठानमा जेष्ठ तथा अशक्तता (क र ख वर्गका)भएका नागरिकहरुसंग स्वास्थ्यकर्मी कार्यक्रम सुरु भएको छ ।

स्वास्थ्य कार्यालय प्यूठानको आयोजना तथा स्थानीय तहहरुको सहकार्यमा मंसिर २४ गतेदेखि ३० गते सम्म यो कार्यक्रम सञ्चालन हुने स्वास्थ्य कार्यालय प्यूठानले जानकारी दिएको छ।

८० बर्ष माथिका जेष्ठ तथा क र ख वर्गका अशक्तता भएका नागरिकहरुसंग स्वास्थ्यकर्मी कार्यक्रम अन्तरगत यो कार्यक्रम सुरु गरिएको हो । यो अवधिभर प्यूठान जिल्लाका सबै स्थानीय तहका स्वास्थ्य संस्थामा कार्यरत स्वास्थ्यकर्मीबाट घरमै गई निःशुल्क स्वास्थ्य परिक्षण तथा परामर्श सेवा दिईनेछ । कार्यक्रम अवधिभर स्वास्थ्यकर्मीहरु नागरिकहरुको घरदैलोमा पुगी सामान्य स्वास्थ्य परिक्षण गरिने स्वास्थ्य कार्यालय प्यूठानका कोल्डचेन अधिकृत कोशलराज बैद्यले जानकारी दिए । उनका अनुसार ८० बर्ष माथिका जेष्ठ तथा क र ख वर्गका अशक्तता भएका नागरिकहरुको सामान्य स्वास्थ्य परिक्षण,परामर्श सेवा,रक्तचाप,सुगर र पिसाबको परिक्षण गरिएको छ ।
प्यूठान जिल्लामा हाल ८० बर्षमाथिका २ हजार १ सय ७६ जना जेष्ठ नागरिक रहेको स्वास्थ्य कार्यालय प्यूठानको तथ्यांकमा उल्लेख छ। त्यस्तै तथ्यांक अनुसार क वर्गको अशक्तता भएका २ सय ७६ र ख वर्गको अशक्तता भएका १ हजार ३ सय ४ जना नागरिक रहेका छन् । कार्यक्रमको अवधिभर ३ हजार ७ सय ५६ जना ८० बर्ष माथिका जेष्ठ नागरिक तथा क र ख वर्गका अशक्तता भएका नागरिकहरुलाई सेवा प्रदान गर्ने लक्ष्य रहेको स्वास्थ्य कार्यालय प्यूठानका प्रमुख हेमराज पाण्डेले जानकारी दिए । प्रमुख पाण्डेले मंसिर १३ गते जिल्लास्थित सरोकारवालाहरुको बैठक बसी यस्तो निर्णय गरेको बताए। जिल्लाका नौ वटै स्थानीय तहहरुमा प्रभावकारी रुपमा सञ्चालन भईरहेको प्रमुख पाण्डेको भनाई छ।