नेकपा (एमाले) का अध्यक्ष केपी शर्मा ओलीले गठबन्धन सरकार निकम्मा भएको टिप्पणी गरेका छन्।
पार्टी निकट खेलकुद संगठनले बिहीबार च्यासलमा गरेको कार्यक्रममा बोल्दै अध्यक्ष ओलीले नेकपा (माओवादी केन्द्र) नेतृत्वको गठबन्धन सरकारलाई देशद्रोहीको संज्ञा दिएका हुन ।उनले जनताको बलमा मौजुदा सरकारविरूद्ध आन्दोलनको खाँचो रहेको बताए।

उनले जनताको बलमा आन्दोलनमा उत्रनुपर्ने र देश बर्बाद हुनबाट जोगाउनुपर्ने आवश्यकता रहेको बताए। विरोधीहरू एमालेविरूद्ध एक्लै लड्ने् आँट नगरेको भन्दै उनले यसमा गर्व गर्नुपर्ने बताए।
अध्यक्ष ओलीले सरकार भ्रष्टाचार र भ्रष्टाचारीको संरक्षक भएको बताएका छन्। ‘कमिसनखोरी र त्यसको संरक्षण, तस्करी र त्यसको संरक्षण, आयोजक र संरक्षक छ सरकार!,’ उनले भने। उनले यस्तो स्थितिमा ‘मिसन २०८४’ भनेर पर्खन नसकिने बताए। जनताको बलमा आन्दोलन गर्नुपर्ने उनको भनाई छ । त्यसका लागि पार्टीलाई संगठित र अनुशासित बनाउनुपर्ने आवश्यकता रहेको ओलीले बताएका छन्।