प्यूठान जिल्लामा अनाधिकृत रुपमा रहेका घुमन्ते व्यापारीहरुलाई निरुत्साहित गर्नको लागि प्यूठान उद्योग वाणिज्य संघले होडिङ्ग वोर्ड राखेको छ । आईतबार जिल्लाको स्थानीय तह प्रवेशद्धार वा मुख्यमुख्य स्थानहरुमा अनाधिकृत झोले कुम्ले व्यापारीहरुको लागि जानकारीमुलक होडिङ्ग वोर्ड राखिएको प्यूठान उद्योग बाणिज्य संघले जनाएको छ ।

अनाधिकृत घुमन्ते व्यापारीहरुको कारणले गर्दा नेपाल सरकारले तय गरेको मापदण्डहरुको अवलम्बन गर्दै संचालन गरेका उद्योगी व्यवसायीहरुलाई मर्का पर्नुका साथै कमसल तथा गुणस्तरहिन सामग्रीहरुको विक्रि वितरण गरेको समेत पाईएको संघका महासचिव सन्देश आचार्यले जानकारी दिए । उनका अनुसार घुमन्ते व्यापारीहरुले गर्दा कर तिरेर, सटर भाडामा लिएर उद्योग व्यवसाय गर्नेहरुलाई असर परेको भन्दै यसलाई रोकथाम गर्नको लागि होर्डिङ बोर्ड नै राखिएको हो ।

यस अघि पनि स्थानीय तहहरुले सूचना निकालेको तर त्यो पूर्णरुपमा कार्यान्वय नभएको हुँदा अहिले त्यसलाई करको दायरा र पूर्णरुपमा कार्यान्वयनमा ल्याउनको लागि यो कार्यलाई तिव्रता दिईएको महासचिव आचार्यको भनाई छ । उपभोक्ताहरु त्यस्ता कार्यबाट ठगिने भएकोले सो कामलाई निरुत्साहित गर्न सहयोग गरिदिन सम्बन्धित स्थानीय तह, जिल्ला प्रशासन कार्यालय, जिल्ला प्रहरी कार्यालय लगायत सबै सरोकारवाला निकायहरुलाई आग्रह समेत गरेको उनले बताए ।

साथै अनाधिकृत रुपमा व्यवसाय गरिरहेका व्यवसायीहरुलाई करको दायरामा आई निश्चित स्थानमा व्यवसाय संचालन गर्न तथा करको दायरामा नआएको खण्डमा कानुनी प्रक्रियामा जाने पनि प्यूठान उद्योग बाणिज्य संघले जनाएको छ ।