२०८० फागुन ११प्यूठान, स्वर्गद्वारी आश्रम प्युठानको नाममा दर्ता स्रेस्ता कायम भई दाङमा रहेको ७ सय ५३ बिगाहा जग्गामा मोही भरेका किसानले मोहियानी हक नपाएको भन्दै चरणबद्ध आन्दोलनका कार्यक्रम सुरू गरेका छन्।
दाङमा रहेका स्वर्गद्वारी गुठी पीडित मोही किसानहरूले शुक्रबार सडकमै सुतेर आन्दोलन गरेका छन्।
उनीहरूले आज जिल्ला प्रशासन कार्यालयको गेटअगाडि देखि आन्दोलन सुरू गरेर तुल्सीपुर चोकमा पुगेर झण्डै आधा घण्टा सुतेर विरोध प्रदर्शन गरेका थिए। करिब चार÷पाँच सयको हाराहारीमा किसान उपस्थित छन्। आन्दोलन क्रममा केहीबेर सडक अवरूद्ध समेत भएको थियो।
स्वर्गद्वारी गुठी पीडित मोही किसान संघर्ष समितिका अध्यक्ष प्रभु चौधरीले यसअघि मोहियानी हकका लागि विभिन्न चरणका आन्दोलन भई सरकारसँग धेरै पटक सम्झौता भए पनि त्यसको कार्यान्वयन नभएको हुँदा चरणबद्ध आन्दोलन सुरू गर्नु परेको बताएका छन् ।
