गाई भैैसीमा बाँझोपन निवारण गर्नको लागि डोर टु डोर कार्यक्रम प्यूठानमा सञ्चालन भएको छ । मंगलबार राष्ट्रिय पशु प्रजनन कार्यालय नेपालगंज बाकेका प्राविधिक सहितको टिम प्यूठान आई प्यूठान नगरपालिका ४ मा किसानको गोठमै पुगेर बाँझोपन भएका गाई भैंसीलाई सुई लगाईएको छ । सोही कार्यक्रम बुधबार स्वर्गद्धारी नगरपालिकामा समेत गर्ने कार्यालयले जनाएको छ । लगाईसकेपछि औषधी समेत वितरण गरिएको छ ।

राष्ट्रिय पशु प्रधान कार्यालय नेपालगंजका कार्यालय प्रमुख डा. खगेन्द्रराज सापकोटाले किसानलाई कार्यालयमै बोलाएर औषधी बाड्दा वास्तविक समस्या पत्ता लगाउन कठिनाई हुने भएकाले यथार्थ किसानको समस्यालाई बुझ्न फिल्डमै पुग्ने गरेको बताए । फिल्डमै पुगेपछि पशुले के कारणले, के अवस्थामा, कुन तत्वको कमिले वा पाठेघर कुन तरिकाले बाँझोपन भयो भन्ने सबै तथ्यको पहिचान गर्ने गरेको बताएका छन् । साथै बाँझोपन एउटै कारणले नहुने भन्दै सबै व्यवस्थापनलाई बुझ्न आवश्यक रहेको उनको भनाई थियो ।

किसानको गोठमा पुगेर सेवा दिएको भन्दै प्यूठान नगरपालिकाले खुसी व्यक्त गरेको प्यूठान नगरपाकिलाका नगरप्रवक्ता सुमनराज श्रेष्ठले बताए । किसानलाई दिने हरेक सेवाको सन्दर्भमा सबै सेवाहरु किसान माझ पुर्‍याएको दाबी गरे । यसले गर्दा कृषि क्षेत्रलाई अझ प्रवाभकारी हुने समेत उनले विश्वास लिएका छन् ।

कार्यक्रममा राष्ट्रिय पशु प्रजनन कार्यालय नेपालगंज बाकेका प्राविधिक सहितको टिम, एकिकृत कृषि तथा पशुपंछी विकास कार्यालय प्यूठानका प्रमुख उमेश चन्द्र श्रेष्ठ, प्यूठान नगरपालिकाका पशु शाखा प्रमुख गिरिराज पौडेल, वडा नं ४ का वडाध्यक्ष रेशम कार्की लगायतको सहभागिता थियो ।

एकिकृत कृषि तथा पशुपंछी विकास कार्यालय प्यूठानको आयोजना र राष्ट्रिय पशु प्रजनन कार्यालय नेपालगंज बाकेको प्राविधिक सहयोगमा कार्यक्रम भएको हो ।