माण्डवी गाउँपालिकामा अहिले गाउँघरमा सुत्केरी हुन छाडेका छन् । गाउँपालिकाले दिएको तथ्यांक अनुसार चालु आर्थिक बर्षको श्रावणदेखि वैशाख महिनासम्म १ सय २४ जनाले संस्थागत सुत्केरी सेवा लिएका छन् । चालु आर्थिक बर्षको वैशाख महिनासम्म माण्डवी गाउँपालिकामा घरमा हुने सुत्केरी शुन्य रहेको पालिकामा कार्यरत सिनियर अहेव नारायण जि.सी ले बताए ।

घरमा हुने सुत्केरीलाई शुन्यमा ल्याउन र सुत्केरीको अवस्थालाई सहज बनाउनको लागि पनि गाउँपालिकाले चालु आर्थिक बर्षदेखि नै संस्थागत सुत्केरीलाई जोड दिंदै आएको थियो । घरमा सुत्केरी हुँदा आमा र बच्चाको अवस्था जोखिम हुने भन्दै गाउँपालिकाले सबैलाई संस्थागत सुत्केरीमा जोड दिएको छ । संस्थागत सुत्केरीका कारण आमा र बच्चाको स्वास्थ्य अवस्था राम्रो हुने र स्वास्थ्यप्रतिको जोखिम पनि कम हुने माण्डवी गाउँपालिकाका स्वास्थ्य शाखा प्रमुख धुव्र कुमार पोख्रेलले जानकारी दिए । उनका अनुसार सुत्केरीको सहजताको लागि गाउँपालिकाले निःशुल्क रुपमा एम्बुलेन्सको समेत व्यवस्था गरेको छ । सुत्केरीका लागि एम्बुलेन्स सेवा निःशुल्क छ, “पोख्रेलले भने, अस्पताल आउन जान कुनै पैसा लाग्दैन् ।”

गाउँघरमा हुने सुत्केरी शुन्य भएपछि प्यूठान जिल्लाको पहिलो गाउँपालिकाको रुपमा माण्डवी गाउँपालिकालाई यहि जेठ २६ गते पूर्ण संस्थागत प्रसूति सेवायुक्त गाउँपालिका समेत घोषणा गरिएको छ ।