प्युठान अस्पतालमा हैजाका शङ्कास्पद बिरामी फेला परेका छन् ।

आज बिहान प्युठान अस्पतालमा भर्ना भएका गौमुखी गाउँपालिका वडा नं ५ का ५ जना बिरामी मध्ये ३ जनामा आरडिटी परीक्षण पोजेटिभ देखिएको प्युठान अस्पताल विजुवारका मेडिकल सुपरिटेन्डेन्ट डा. राजेन्द्र पौडेलले बताए ।

१२ वर्षीय बालक, ३५ वर्षीय पुरुष र ७२ वर्षीय महिलामा हैजाको शङ्कास्पद बिरामीलाई प्रारम्भिक परीक्षण गरिने आरडिटी पोजेटिभ देखिएपछि प्रदेश प्रयोगशालाबाट विज्ञको टोली बोलाइएको छ । बुटवलबाट टोली हिँडिसकेको डा. पौडेलले बताए । प्रारम्भिक परीक्षणमा पोजेटिभ देखिएपछि बिरामीको नमुनाको कल्चर गर्नुपर्दछ ।

सोही ठाउँका अरु ३ जना सोही लक्षणको बिरामी परेर स्वास्थ्य चौकी लिवासेमा भर्ना भएका छन् । उनिहरुले प्रयोग गर्दै आएको खानेपानीको मुहानको पानी परीक्षण गर्न प्युठान अस्पतालका प्रयोगशाला प्रमुख सहित स्वास्थ्य कार्यालयको टोली गौमुखी गाउँपालिकातर्फ गएको छ ।