एमालेले पूर्वमाओवादी पृष्ठभूमि भएका एमाले स्थायी कमिटी सदस्य मणि थापालाई पदमुक्त गरेको छ । पार्टीमा लामो समयदेखि निष्क्रय रहेको भन्दै उनलाई एमालेले बिहीबारको सचिवालय बैठकबाट पदमुक्त गरेको हो । उनी एमालेको मूल नेतृत्व (केपी शर्मा ओली) को कार्यशैली र विचारसँग असहमत भएको भन्दै पार्टीमा लामो समयसम्म निष्क्रृय थिए ।

पार्टीको विधानले लगातार तीन वटा बैठकमा बिना जानकारी अनुपस्थित भए पदमुक्त गर्ने प्रावधान छ । उहाँ लामो समय पार्टीका काममा निष्क्रय भएकाले स्वतः पदमुक्त हुनुभएको हो,’स्थायी कमिटी सदस्य एवं प्रचार विभाग प्रमुख राजेन्द्र गौतमले भने, ‘मणि जी गत निर्वाचनमा पनि पार्टीको काममा खट्नु भएन । उहाँ साहित्य सिर्जनामा बढी व्यस्त हुनुहुन्छ होला ।’ थापाले भने आफूले गत वर्ष राजीनामा दिइसकेको बताएका छन् । ‘पार्टीको मुख्य कुरा विचार र कार्यशैली हो । त्यसमा सहमत हुन नसकेपछि मैले राजीनामा दिएको थिएँ,’ उनले भने,‘एमालेले त्यसलाई स्वीकृत गर्न ढिला गरेको थियो । स्वीकृत भएछ, राम्रो भयो ।’