कोरोना भाइरस विरुद्धको फाइजर–बायोएनटेक खोप अभियान आगामी बुधवारदेखि सञ्चालन हुँदै छ । स्वास्थ्य कार्यालय प्युठानले आइतबार सञ्चारकर्मी हरूसँग अभिमुखीकरण कार्यक्रम गरी खोप अभियानबारे जानकारी गराएको छ ।

भदौ २६ देखी ३१ गतेसम्म लगाइने खोप अभियानमा १२ माथिका उमेरका नागरिकलाई खोप दिइने स्वास्थ्य कार्यालय प्युठानका निमित्त कार्यालय प्रमुख मधुसूदन खड्काले जानकारी दिए । खड्काका अनुसार प्युठानमा ४० हजार डोज फाइजर–बायोएनटेक खोप उपलब्ध रहेको छ ।

समुदाय स्तरमा रहेका हरेक खोप केन्द्रमा अभियानको टोली पुग्ने योजना बनेको कार्यालयले जनाएको छ । ०.३ मि.लि. मात्रा मासुमा दिइने यो खोप यसअघि पहिलो मात्रा खोप लगाएपछि गम्भीर प्रकारको एलर्जी भएका व्यक्ति, ३ महिना पूरा नभएका गर्भवती महिला र खोपमा रहेको कुनै तत्त्वसँग एलर्जी भएका व्यक्तिलाई भने दिन नमिल्ने खड्काले बताए ।

विश्व स्वास्थ्य सङ्गठनले आपत्कालीन प्रयोगका लागि सूचिकृत गरेको र औषधि व्यवस्था विभागले अनुमति दिएको फाइजर–बायोएनटेक खोप लगाउन स्वास्थ्य तथा जनसङ्ख्या मन्त्रालयले खोप तालिका बनाएर अभियान सुरु गरेको हो ।

गत माघ महिनामा बुस्टर डोज नलगाएका र १२ वर्ष माथिका सबै नागरिकलाई खोप अभियानमा सहभागी हुन् स्वास्थ्य कार्यालयले आग्रह गरेको छ ।