६० औँ राष्ट्रिय बाल दिवस प्युठानमा पनि मनाइएको छ । “बालबालिकामा लगानी, सुनिश्चित भविष्यको थालनी” भन्ने नारासहित प्युठानका विभिन्न ठाउँमा कार्यक्रम गरी मनाइएको छ ।

दिवसकै अवसरमा नेपाल बाल सङ्गठन जिल्ला शाखा प्युठानको आयोजनामा नगरपालिका मावि स्तरीय कविता प्रतियोगिता र प्रावि स्तरीय खेलकुद प्रतियोगिता सम्पन्न भएको छ ।

प्यूठान नगरपालिका २ स्थित बाल मन्दिरमा भएको कार्यक्रमको लागि आर्थिक सहयोग प्यूठान नगरपालिका र नगरपालिका स्तरीय बाल सञ्जालले गरेका थिए।

कार्यक्रममा प्रावि तर्फको खेलकुद प्रतियोगिताको हिसाब दौडमा छात्रामा प्रथम जानकी मा।वि चितिखोलाकी पार्वता पछाई, द्वितीय कन्याकुमारी प्रा।वि की तुलसा वि क,  तेस्रो मुक्ति मा वि रातामाटाकी सिम्रन रोका क्षेत्री र सान्त्वना शारदा मा।वि साँपडाँडाकी सृष्टि परियार भएकी छिन् । प्रतियोगितामा ७ विद्यालयको सहभागिता थियो ।

छात्र तर्फ चम्चा दौडमा प्रथम अम्बिका आधारभूत विद्यालय हरिखोलाका बिरजन धामी, द्वितीय शारदा आधारभूत विद्यालय सापडाँडाका सुजल अधिकारी, तेस्रो सत्य प्रा.वि. सेपुङका अर्जुन सुनार र सान्त्वना कन्याकुमारी प्रा.वि. का चुमान सिं धामी भएका छन् ।

प्यूठान नगरपालिका मा।वि स्तरीय कविता प्रतियोगितामा १३ विद्यालयका विद्यार्थीले भाग लिएका थिए । जसमा प्रथम बिपना रोका ने.रा. मा.वि. टारी, मुक्ति मा.वि. रातामाटाकी सुदिक्षा श्रेष्ठ द्वितीय, शारदा मा.वि. सापडाँडाकी प्रविशा खड्का तेस्रो र सान्त्वना भुवनेश्वरी मा.वि. की सुवानी खड्का भएकी छिन् ।

नेपाल बाल सङ्गठन जिल्ला शाखा प्युठानका सभापति चन्द्रकान्त पोख्रेलको अध्यक्षतामा भएको कार्यक्रमको सञ्चालन सचिव लोक बहादुर विष्टले गरेका थिए ।

सरोकारवाला सबैको साझा धारणा हुनुपर्छ: नगरप्रमुख योगी

प्यूठान नगरपालिका २ स्थित बाल मन्दिरमा भएको कार्यक्रममा बोल्दै प्यूठान नगरपालिकाका नगरप्रमुख विष्णु बहादुर योगीले बालबालिकाहरूको हक अधिकार सुनिश्चित गर्न सरोकार राख्ने सबैको भूमिका साझा हुनुपर्ने बताएका छन् ।

हरेक वर्ष मनाइने दिवस र औपचारिक कार्यक्रमले मात्र बालबालिकाको लागि हित नहुने भएकाले यसको लागि ३ वटै सरकार र अभिभावकको मुख्य भूमिका हुने बताएका हुन् ।

यस्तै नगरप्रमुख यागिले सडक बालबालिका रहित बनाउनको लागि सबै बालबालिकालाई शिक्षामा जोड्ने तयारीमा रहेको बताए।