प्यूठान जिल्ला पूर्ण विद्युतीकरण हुने तयारीमा छ ।

जिल्लालाई आर्थिक वर्ष २०८१/०८२ सालसम्म उज्यालो प्यूठान घोषणा गर्ने गरी विद्युत् विस्तारको कामलाई तीव्रता दिइएको नेपाल विद्युत् प्राधिकरण प्यूठान वितरण केन्द्रका कार्यालय प्रमुख महेन्द्र कुमार दासले बताए । दासका अनुसार जिल्लामा ५८ हजार घरमा विद्युत् जडान भइसकेको छ ।

प्युठानको ६४ वटा वडामध्ये २ वटा वडा बाहेक बाँकी सबै वडामा पूर्ण विद्युतीकरण भएको कार्यालय प्रमुख दासको भनाई छ । नौबहिनी गाउँपालिका १ स्याउलिवाङ र गौमुखी गाउँपालिका ३ रजवारामा पूर्णरुपमा विद्युतीकरण भएमा जिल्लाको सबै क्षेत्र विद्युतीकरण हुने प्राधिकरणले जनाएको छ । यो  स्थानमा कार्यालयले पोल गाड्ने र तार तान्ने कामलाई निरन्तर रूपमा अघि बढाएको बताएको छ ।

नौबहिनी १ को स्याउलिवाङमा २ सय ८५ घरमा र गौमुखी ३ रजवारामा २ सय १५ घरमा विद्युतको पहुँच पुगेको छैन । त्यहाँका स्थानीयले हाल लघुजलविद्युत प्रयोग गर्दै आइरहेका छन् ।