प्युठानमा गत आर्थिक वर्षको ५ लाख ३५ हजार रुपैयाँ विद्युत् बक्यौता उठ्न बाँकी रहेको छ ।

विद्युत् बक्यौता उठाउनका लागि प्राधिकरणले ५ सय ३९ ग्राहकको लाइन काटेकोमा ४१ ग्राहकले अझै नजोडेको नेपाल विद्युत् प्राधिकरण प्यूठान वितरण केन्द्रका कार्यालय प्रमुख महेन्द्र कुमार दासले बताए ।

कार्यालयले गत आर्थिक वर्षमा जिल्लामा ५ सय ३९ ग्राहकको लाइन काटेको थियो । लाइन काटेकामध्ये ४ सय ९८ ग्राहकले तिर्न बाँकी महसुल २५ लाख ४४ हजार बुझाएका छन् । उठ्नुपर्ने ३० लाख ७९ हजार मध्ये ५ लाख ३५ हजार बाँकी रहेको प्रमुख दासले बताए ।

प्राधिकरणले २ महिनासम्म महसुल नतिर्नेको लाइन काट्ने नियमको व्यवस्था गरेको छ ।  १ सय ८० दिनसम्म महसुल नतिर्नेको लाइन काटिएको प्रमुख दासले बताए । साथै प्राधिकरणको नियमानुसार विद्युत् रिडिङ भएको एक हप्तासम्म २ प्रतिशत छुट, १५ दिनसम्म बिलबमोजिमको महसुल तिर्नुपर्ने व्यवस्था छ । त्यस्तै १६ दिनपछि एक महिनासम्म ५ प्रतिशत, ४० दिनसम्म १० प्रतिशत र सो भन्दा लामो समयको बक्यौता रहेमा २५ प्रतिशतसम्म जरिवाना लाग्ने गर्दछ ।