साहित्यकार राजकुमारी कुँवर ‘सानु गुल्मेली’द्वारा लिखित कथा सङ्ग्रह ‘ऐँजेरु’को विमोचन गरिएको छ ।

मङ्गलवार  साहित्य परिषद् प्युठानले एक कार्यक्रमको आयोजना गरी कथा सङ्ग्रहको विमोचन गरेको हो ।

साहित्यकार गुल्मेलीका श्रीमान् दिपक खड्काले प्रकाशन गरेको कथा सङ्ग्रहका ८८ वटा पृष्ठमा, ११ वटा कथाहरू समेटिएको छ । कथा सङ्ग्रह विमोचन गर्दै प्यूठान नगरपालिकाका नगरप्रमुख विष्णु योगीले समाज परिवर्तनमा साहित्यले महत्त्वपूर्ण भूमिका खेल्ने बताए । साहित्य, कला र भाषाको विकासले समाजमा देखा पर्ने विकृति हटाउन मद्दत गर्ने उनको धारणा थियो ।

कार्यक्रममा नगर उपप्रमुख देवेन्द्र बर्मा, साहित्य परिषद् प्युठानका निवर्तमान अध्यक्ष गेहराज थापा, नेपाल रेडक्रस सोसाइटी प्युठानका सभापति गुमानराज पुलामी, नेपाल पत्रकार महासङ्घ प्युठानका अध्यक्ष सञ्जय रिजाल, उद्योग वाणिज्य सङ्घका प्युठानका महासचिव सन्देश आचार्य, साहित्य परिषद् प्युठानका कार्यवाहक अध्यक्ष विमला खनाल, सिता गौतम रिजाल, साहित्यकार कमल पोख्रेल, साहित्यकार देवेन्द्र कुमार रिजाल र टेकराज के.सी.ले यस्ता रचनाहरूले भाषा, साहित्य र संस्कृतिको विकास गर्दै समाजमा नैतिकताको विकास गर्ने बताए ।

कथा सङ्ग्रहको समालोचना साहित्यकार तथा शिक्षक माधव पोख्रेलले गरेका थिए ।