लायन्स क्लब अफ ईन्टरनेसनलले प्यूठान अस्पतालमा डायलाईसिस मेसिन खरिदका लागि १ करोड ३० लाख २७ हजार ५ सय ५७ रुपैयाँको चेक हस्तान्तरण गरेको छ । शनिवार एक कार्यक्रमका बिच क्लबका निवर्तमान गभर्नर मुकुट ढकालले चेक हस्तान्तरण गरेका हुन् ।

लायन्स ले जिल्ला समन्वय समितिका प्रमुख धरम जिसी, प्यूठान अस्पताल विकास समितिका अध्यक्ष विजय बिराज विष्टलाई ढकालले संयुक्त रूपमा चेक हस्तान्तरण गरेका हुन् ।

चेक हस्तान्तरण कार्यक्रममा बोल्दै प्रमुख अतिथि जिल्ला समन्वय समिति प्यूठानका प्रमुख धरम बहादुर जिसीले डायलाइसिस खरिदको लागि रकम प्राप्त भएकोमा खुसी व्यक्त गर्दै स्थानीय सरकारले प्रतिबद्धता गरेअनुसार रकम समयमा प्राप्त हुन नसक्दा ढिलो हुन पुगेको बताए । कार्यक्रममा बोल्दै अस्पताल विकास समितिका अध्यक्ष विजय बिराज विष्टले तत्काल मेसिन सञ्चालनको तयारी गरिने बताए ।

लायन्स क्लब अफ इन्टरनेश्नलका निवर्तमान गभर्नर मुकुट ढकालले डायलाइसिस मेसिन खरिद पश्चात् प्यूठान जिल्ला सहित रोल्पा, अर्घाखाँची, गुल्मी लगायतका छिमेकी जिल्लाका बिरामीहरूले लिने सेवामा सहज हुने उनको विश्वास छ ।

डायलाइसिस परियोजनाका प्रमुख नवीन कुमार श्रेष्ठको अध्यक्षतामा भएको चेक हस्तान्तरण कार्यक्रममा प्यूठान अस्पताल विकास समितिका अध्यक्ष विजय बिराज विष्ट, लायन्स क्लब अफ प्यूठानका चियर पर्सन अर्जुन कुमार कक्षपति, प्यूठान अस्पतालका निमित्त मेडिकल सुपरिटेन्डेन्ट गोविन्द रावत लगायतले मन्तव्य राखेका थिए ।