झिमरुक गाउँपालिकाले कृषि हाटबजार सञ्चालनका लागि तयारी थालेको छ । स्थानीय उत्पादनको बजारीकरणका लागि कृषि व्यवसाय प्रवर्द्धन तथा बजारीकरण कार्यक्रम अन्तरगत कृषि हाटबजार सञ्चालन गर्न लागिएको गाउँपालिका अध्यक्ष पित बहादुर महतरा क्षेत्रीले बताए । स्थानीय कृषकबाट उत्पादित कृषि उपजहरू हाटबजार मार्फत बिक्रीका लागि सहजीकरण गर्न गाउँपालिकाले यो आर्थिक वर्षदेखि हाटबजार सञ्चालन गर्ने कार्यक्रम ल्याएको उनको भनाई छ ।

अध्यक्ष महतरा क्षेत्रीका अनुसार गाउँपालिकाले जग्गा प्राप्त हुने बित्तिकै स्टल बनाउने कार्य सुरु गर्नका लागि बजेट व्यवस्थापन गरिसकेको जनाएको छ । गाउँपालिका भित्र उत्पादन हुने आलु, बेसार(हलेदो), भटमास, कोदो र फापरको उत्पादन प्रवर्द्धन र बजारीकरणका लागि कृषकलाई उत्पादनको आधारमा अनुदान र सङ्कलकका लागि अनुदान कार्यक्रम पनि सञ्चालन गर्न थालेको महतराले बताए । कोदो, फापर र भटमासमा प्रतिकिलो १० रुपैयाँ, काँचो बेसारमा प्रतिकिलो ५ रुपैयाँ र आलुमा प्रतिकिलो ६ रुपैयाँ कृषकलाई अनुदान दिने, सबै उत्पादनको सङ्कलन र भण्डारणका लागि सङ्कलनको जिम्मा लिने सहकारी वा समूहलाई प्रतिकिलो ३ रुपैयाँ अनुदान दिने र बजारीकरणको व्यवस्था गाउँपालिकाले गर्ने गरी कार्यविधि पास गरिएको अध्यक्ष महतराले बताए ।

झिमरुक गाउँपालिकाका चालु आर्थिक वर्षको स्वीकृत कार्यक्रम अन्तरगत कृषि उपज सङ्कलन र हाटबजार सञ्चालनका लागि प्रक्रिया थालिएको प्रमुख प्रशासकीय अधिकृत कृष्णबहादुर थापाले बताए । मच्छी बजार क्षेत्रबाट बढीमा ५ सय मिटर दुरीमा रहने गरी जग्गा भाडामा लिन गाउँपालिकाले १५ दिने सूचना समेत सार्वजनिक गरेको छ । सङ्कलन तथा भण्डारणका लागि सहकारी र कृषक समूह सहभागी हुनुपर्ने भनेको छ ।