नागरिकका सरोकारका विषयमा नौबहिनी गाउँपालिका १ स्याउलिबाङ्गमा सर्वपक्षीय छलफल भएको छ ।

जनप्रतिनिधि, प्रमुख जिल्ला अधिकारी, प्रहरी प्रमुख र स्थानीयको उपस्थितिमा शनिवार विकासका पूर्वाधार, आवश्यकता र उत्पादनको विषयमा छलफल भएको नौबहिनी गाउँपालिकाका अध्यक्ष दिल बहादुर थापाले बताए ।

छलफलमा स्याउलिवाङ्गमा नेपाल विद्युत् प्राधिकरणको केन्द्रीय प्रसारण लाइन विस्तारमा भएको ढिलासुस्ती, नेपाल टेलिकमको टावरमा भएको ब्याट्री ब्याक–अपको समस्या, सडक विस्तार तथा स्तरोन्नति, खाद्य बस्तुहरूको चेकजाँच, स्थानीय उत्पादित बस्तुको बजारीकरण, दुर्घटना न्यूनीकरणका लागि अस्थायी प्रहरी बिट निर्माण र बाग्दुला–बहाने हुँदै स्याउलिवाङ्गको यातायात भाडा दर समायोजन लगायतका विषयहरु समावेश भएका थिए ।

कार्यक्रममै जिल्ला प्रशासन कार्यालयले अपाङ्ग, विपन्न तथा गरिब ५० घरपरिवारलाई राहत स्वरूप १-१ थान कम्मल वितरण गरेको छ । त्यस्तै नौबहिनी गाउँपालिकाले वडाका ७५ वर्ष माथिका ज्येष्ठ नागरिकलाई १-१ थान छाता र लट्ठी वितरण गरेको छ । सोही कार्यक्रमको क्रममै लागू औषध नियन्त्रणको विषयमा पनि अन्तरक्रिया भएको थियो ।

नौबहिनी गाउँपालिकाका अध्यक्ष दिल बहादुर थापाको अध्यक्षता भएको कार्यक्रममा प्रमुख जिल्ला अधिकारी रमा आचार्य, जिल्ला प्रहरी कार्यालय प्यूठानका प्रहरी नायब उपरीक्षक दिनेश बस्याल, सडक पूर्वाधार विकास कार्यालयका निमित्त कार्यालय प्रमुख चन्द्र बहादुर शाह, विद्युत् प्राधिकरण प्युठान वितरण केन्द्रका सब–इन्जिनियर प्रज्वल हुमागाईँ, नागरिक समाजका प्रतिनिधिहरू, विभिन्न राजनीतिक दलका नेता, स्थानीय बुद्धिजीवी लगायतको सहभागिता थियो ।