प्यूठानमा जटिल प्रकारका आँखाका बिरामीका लागि आगामी बिहीबार विशेषज्ञ चिकित्सक सहितको शल्यक्रिया शिविर सञ्चालन हुने भएको छ । आँखा उपचार केन्द्र प्रस्तावित नरेन्द्र गायत्री आँखा अस्पताल बिजुवारको आयोजनामा सञ्चालन हुने शिविरमा अस्पतालसँग सम्झौता गरेका स्थानीय तहका ज्येष्ठ नागरिकहरूले निःशुल्क उपचार सेवा पाउने अस्पतालका प्रमुख लक्ष्मी मल्ल ठकुरीले बताइन् ।

आँखा धमिलो देखिने र मोतीबिन्दुको लक्षण भएका बिरामीहरूले बुधवार चेकजाँच गराउन सक्ने अस्पतालले जनाएको छ । जटिल प्रकारका शल्यक्रिया गर्नुपर्ने बिरामीका लागि बिहीबार विशेषज्ञ सेवा सञ्चालन हुने ठकुरीले बताइन् । जिल्लाका ६ वटा स्थानीय तहले अस्पतालसँग सम्झौता गरेर ज्येष्ठ नागरिकको निःशुल्क आँखा उपचार गर्दै आएका छन् । नौबहिनी गाउँपालिका,गौमुखी गाउँपालिका, झिमरुक गाउँपालिका, प्यूठान नगरपालिका, ऐरावती गाउँपालिका र माण्डवी गाउँपालिकाले अस्पतालसँग सम्झौता गरिसकेका छन् भने मल्लरानी गाउँपालिकासँग सम्झौता गर्ने तयारी भइरहेको प्रमुख मल्लले बताइन । वडाको सिफारिसको आधारमा मल्लरानीका ज्येष्ठ नागरिकको पनि निःशुल्क उपचार गर्ने गरिएको उनले बताइन ।

स्वर्गद्वारी नगरपालिका र सरुमारानी गाउँपालिकाले भने अस्पतालसँग सम्झौता गरेका छैनन् । प्यूठान जिल्लाको गौमुखी गाउँपालिकाको ठुलावेशी र स्वर्गद्वारी नगरपालिकाको भिङग्रीमा समेत शाखा बिस्तार गरेको अस्पतालले जनाएको छ । २०६४ सालमा स्थापना भएको अस्पतालले हरेक महिनाको एक पटक विशेषज्ञ सहितको शिविर आयोजना गर्दै आएको अस्पतालका अध्यक्ष लक्ष्मी प्रकाश राज भण्डारीले बताए । बिहीबारको शिविरका लागि लुम्बिनी नेत्र विज्ञान अध्ययन संस्थान रण अम्बिका शाह आँखा अस्पताल भैरहवाबाट विशेषज्ञ टोली  प्यूठान आउन लागेको  अस्पतालले जनाएको छ ।